Delivery rider, tighatud sab og shabu
CEBU, Philippines — Nabalhog sa prisuhan ang usa ka 29-anyos nga delivery rider human kini nadakpan sa mga operatiba sa Drug Enforcement Unit sa Inayawan Police Station 7 Cebu City Police Office sa ilang buy-bust operation sa Sitio Dumpsite, Barangay Inayawan, siyudad sa Sugbo, Sabado sa gabii, Enero 4, 2025.
Ang dinakpan mao si Lorenz Uy Jurado alyas Renz, 29, nagpuyo sa Spoliarium Street, Barangay Duljo Fatima ning siyudad ug usa ka High Value Individual. Nasakmitan ang suspetsado og 825 grams nga shabu nga nagkantidad og P5.6 million.
Ang suspetsado nga giingong bodegero sa drugas ug tulo ka semana siya nga gipanid-an human nigawas iyang pangalan sa mga imbestigasyon, g nasuta nga maka dispose kini og 300 grams nga shabu kada semana.
Dili lang Barangay Inayawan ang area of operation niini apan apil na ang mga silingan nga mga barangay matud pa sa kapolisan.
Ang suspect sa iyahang bahin mitug-an nga suholan siya og P5, 000 kada semana kun ma deliver niya ang ilegal nga drugas.
Dili kini ang unang higayon nga naka deliver ang suspek, ang unang hatod niya sa drugas nahitabo November dayon nasundan pag December sa miaging tuig.
Giingong ang contact niya aron kuhaon ang drugas ug i-deliver naa sulod sa prisohan ug pinaagi sa Facebook ang ilang komunikasyon.
Ang iyahang bayaw matud pa nga napriso sab ang nag-engganyo niya nga mosulod sa maong ilegal nga kalihukan.
Giangkon sa suspect nga kuwang ang kita niya sa pagka delivery rider ug tungod sa kalisod ug wala nay laing pamaagi maong nisulod siya sa pagpamaligya niini. Kasong kalapasan sa Republic Act 9165 ang ipasaka batok sa suspetsado. — /IBM (BANAT NEWS)
- Latest
