8 anyos nga bata nadasmagan og motor patay

CEBU, Philippines — Patay ang usa ka otso anyos nga batang lalaki human kini nadasmagan og motor dihang nilabang sa dalan sa may Purok Mangga, Lower Barangay Calajoan sa Lungsod sa Minglanilla sa nilabay nga tungang gabii sa pagsugat sa bag-ong tuig.

Ang nagmaneho sa motor mao si Mark Ryan Canarias 24 anyos nga taga Barangay Pajo, Dakbayan sa Lapu-Lapu.

Giingong kusog nga nagpadagan ang 24 anyos padulong sa Norte nga bahin ug wala na kini makapugong sa dihang kalit nga nilabang ang bata hinungdan nga nalagpot ang biktima.

Ang driver sa motor ug ang bata puros nakaangkon ug kadaut hinungdan dali sila nga gidala sa Minglanilla District Hospital.

Pag-abot sa pipila ka oras sa tambalanan nakutloan gayud sa iyang kinabuhi ang 8anyos nga bata tungod sa grabeng kadaut nga naangkon sa iyang ulo.

Tinguha sa ginikanan sa bata nga mopasang-at gayud ug kaso batuk sa maong driver kinsa kasamtangan karon nagtingkagol sa karsel sa Minglanilla Police Station.

Samtang duha ka disgrasya sa kadalanan ang nahitabo sa Dakbayan sa Talisay sa pagsugat sa bag-ong tuig.

Gipahibawo ni Jonathan Tumulak, pangu sa City of Talisay-Traffic Operation Development Authority (CT-TODA) nga sa ilang pagmonitor sa dalan hapsay ra kini ug walay nakahuot sa dagan sa trapiko.

Adunay mga nagmotorsiklo nga nagsaoy sa kadalanan sa dihang mitungtong ang oras sa tungang gabii.

Gigamit nila ang ilang motor nga maoy nagsaba-saba sa pagsugat sa bag-ong tuig.

Apan duha ka motorsiklo ang nisukarap samtang kini nagdagan.

Hinuon gipasabot ni Tumulak nga wala ray nagrabehan sa disgrasya ug igo lang sila nakaangkon og ginagmay nga pangos. (BANAT NEWS)