OBO sa Cebu City nisobra sa target nga collection

CEBU, Philippines — Mas labaw pa sa target revenue ang nakab-ot sa Office of the Building Official (OBO) sa Dakbayan sa Sugbo diin niabot ngadto sa P153,440,561.83 ang nakoleksiyon nila gikan sa Enero 1 hangtud Disyembre 18 karong tuig 2024.

Base sa report sa Cebu City Public Information nga ang target nga koleksiyon sa OBO anaa sa P150,000,000 alang karong tuiga. Ang pangulo sa OBO Architect Florante Catalan mapasalamaton kang Mayor Raymond Alvin Garcia tungod sa suporrta nga gihatag sa buhatan aron nga makab-ot ang maong koleksiyon sama sa pagdugang og trabahante sa buhatan sa OBO nga makatabang sa pagproseso sa building permits ug adunay dugang trabahante nga makapahigayon og inspeksiyon sa tibuok 80 ka barangay sa siyudad.

Ang kinadak-ang koleksiyon sa OBO mao ang sa Annual Inspection nga nikabat ngadto sa P43,148,579.54 ug gisundan kini sa Business Permits nga nikabat ngadto sa P41,537,203.09 ug Building Permits nga nikabat usab ngadto sa P28, 903,761.42.

Matud ni Catalan nga sa sunod tuig paningkamotan sa ilang buhatan nga mas dako pa ang ilang mahimo nga koleksiyon kon dili man doble apan mas malabwan pa ang koleksiyon karong tuiga. BDB BANAT NEWS