PSA: Child laborer nikunhod ang gidaghanon

CEBU, Philippines — Samtang nagpadayon sa pagkunhod ang gidaghanon sa mga batang nagatrabaho sa tuig 2023 nagpabilin gihapon nga usa ka kabalaka ang pagpadayon sa child labor base sa datos sa Philippine Statistics Authority (PSA).

Ang mga bata nga nagpangedaron og singko ngadto sa 17-anyos nga nagatrabaho niubos ngadto sa 1.09 milyon o 373,000 sa tuig 2023 ikompara sa tuig 2022 nga adunay natala nga 1.48 milyon.

Sa maong gidaghanon 647,000 o 59.1 porsyento niin mga lalaki samtang ang mga babaye adunay gidaghanon nga 447,000 o 40.9 porsyento.

 Sama sa 2022 ug 2021, ang mga lalaki nagpabilin nga mas daghan kompara sa mga batang mga babaye.

Ang service sector giingong maoy nag-una nga employer sa mga batang nagatrabaho nga naglangkub sa 50 porsyento sa tibuok gidaghanon sa tuig 2023 gisundan kini sa sektor sa agrikultura nga naglangkub sa 43.7 porsyento.

Nabantayan nga sa maong sektor nakita ang gamay nga pagtaas gikan sa 43.2 porsyento sa tuig 2022 apan nagpabilin nga ubos sa 45.7 porsyento nga natala sa tuig 2021.

Ang datos nagpakita nga mas gamay ang mga bata nga naapil sa industrial nga trabaho diin aduna lang kini 6.3 porsyento ka mga batang nagatrabaho sa tuig 2023.

Base sa taho sa PSA nga 73.7 porsyento sa mga batang nagatrabaho sulod sa 20 ka oras o menos matag semana ang ilang trabaho.

 Nasayran nga ang maong gidaghanon nikunhod og gamay gikan sa 75.6 porsyento sa tuig 2022 apan nisaka gihapon nga mas taas kompara sa 55.9 porsyento nga natala sa 2021.

Samtang ang gidaghanon sa mga batang nagtrabaho og 21 hangtod 40 ka oras matag semana nikabat sa 16.4 porsyento sa tuig 2023 diin mas taas kini kompara sa 15.7 porsyento sa tuig 2022.

Ang kinatibuk-ang gidaghanon sa mga batang nagatrabaho nga naapil sa child labor nikunhod kini sa 678,000 sa tuig 2023 kompara sa 828,000 sa tuig 2022.

Ang mga lalaki nagpabilin nga nagdominar sa child labor nga adunay gidaghanon nga 62.1 porsyento o 422,000 ang kinatibuk-ang gidaghanon sa mga child laborer sa tuig 2023 samtang ang mga babaye anaa kini sa 37.9 porsyento o 257,000. BDB BANAT NEWS