Dismissed mayor Michael Rama dili ma-disqualify—Atty. Mikel

CEBU, Philippines — Dako ang pagsalig ni Atty. Mikel Rama nga dili ma-disqualify ang kandidatura sa iyang amahan nga si dismissed Cebu City Mayor Michael Rama ug dili mapapas ang pangalan niini sa balota sa alang sa piniliay karong May 2025.

Si Rama subling magpapili isip mayor sa siyudad ubos sa Partido BARUG – BagONG  Sugbo.

Nipasabot si Atty. Mikel kabahin sa duha ka klase sa kaso aron nga matangtang ang pangalan sa balota nga mao ang “petition for cancellation for a certificate of candidacy” ug “petition for disqualification”.

Ang petition for cancellation for a certificate of candidacy mao kini ang dili na mamahimong kandidato.

“Duha ray grounds ana, exclusive sa Omnibus Election Code. I could be wrong, pero sa ako ning pagsabot isip usa ka abogado, duha ra gyud na – material misrepresentation ug nuisance”, pasabot pa ni Atty. Mikel.

Lahi usab ang petition for disqualification gumikan kay ang grounds niini sama sa election violation ug election offenses.

Sayo pa, napahamtangan si Rama og “dismissal from office and perpetual disqualification due to nepotism and grave misconduct charges” sa Ombudsman apan ang mga abogado ni Rama nagkanayon nga wala pa gihapon kini makadawat sa opisyal nga kamandoan gikan sa buhatan sa Ombudsman mahitungod sa maong hukom.

“My final point lang gyud, particularly sa case sa akong amahan, ang pangan sa akong amahan, Mayor Mike Rama, dili na gyud na matangtang sa balota. We will be voting for him in the May 2025 elections”, padayag ni Atty. Mikel.

Gipadayag ni Atty. Mikel nga sulod sa 32 ka tuig nakapangalagad sa mga Sugboanon ang iyang amahan.

“Daghan kaayong gabii maghuna-huna mi nga unsa man ang gibuhat sa akong amahan? Nanarbaho ra na og tinarong diha. Ila ra ra man hinuon nga daog-daogon ug yatak-yatakan?”, butyag ni Atty. Mikel.

Naglaom si Atty. Mikel nga makalingkawas ra gyud ang iyang amahan sa mga gisagubang niini sa kinabuhi politika diin ilang nabatyagan nga padayon gihapon nisuporta ang mga Sugboanon sa iyang amahan.  BDB BANAT NEWS