2 tipi sa riding-in-tandem

CEBU, Philippines — Duha ka mga lalaki ang gipamusil sa riding-in-tandem sa managlahing hitabo kagahapon sa hapon sa Dakbayan sa Sugbo ug sa Mandaue.

Gipusil patay ang 23 anyos nga security guard sa giingong kanhi kapuyo sa iyang kapuyo karon diha sa Sitio Upper Panabang, Barangay Apas kagahapon sa hapon.

Nagkabayo pa sa iyang motorsiklo ug wa nay kinabuhi si Jojie Pelayo kinsa naigo sa ulo samtang nagparada sa iyang gidraybang motor duha ka metros gikan sa ilang balay.

Sumala pa sa amahan niini nga si Jose gikan pa sa trabaho ang iyang anak kauban sa iyang uyab nga si Aquila Bautista.

Sa dihang nakakanaog na ang maong babaye sa tungod sa ilang gipuy-an miabante og duha ka metros ang biktima aron mo-parking apan kalit nilanog ang usa ka sipang buto. Gidudahan sa amahan ang kanhi kapuyo ni Bautista ang mibuhat sa maong krimen kay nagselos kini sa anak nga upat ka buwang nakig-uban sa maong babaye.

Ang mamumuno daling miikyas luwan sa usa ka motorsiklo ug padayon pang gipangita sa kapolisan.

Samtang patay ang usa ka motorista nga biktima sa pagpamusil gihapon sa riding-in- tandem sa Barangay Tabok, Dakbayan sa Mandaue alas 5:30 ang takna kagahapon sa hapon.

Matud ni Police Officer 1 Ritchie Peteluna sa Presinto 3 sa Mandaue City Police Office (MCPO) ang biktima mao si Jeric Sadaya, taga Barangay Labangon, dakbayan sa Sugbo.

Si Police Officer 2 Lemar Pontilla sa Presinto 3 sa MCPO miingon nagsakay og motorsiklo ang biktima gikan sa Consolacion apan pag-abot sa maong dapit gitaparan kini og laing motor ug ang backrider mipusil kaniya.

Diretso og saliring ang motorsiklo sa biktima ug naabtan sa kapolisan nga patay na kini. Padayon pa ang kapolisan sa ilang imbestigasyon apil na ang impormasyon nga gituohang sakop sa Sadaya Drug Group ang biktima.

Sumala pa sa inisyal nga impormasyon gikan sa kapolisan adunay mga pekeng kwarta, cash ug drugas nga nakuha sa crime scene. (BANAT NEWS)