CEBU, Philippines — Gihulagway nga “incompetent” ni kanhi bokal Grecilda “Gigi” Sanchez ang hepe sa Civil Security Unit sa Kapitolyo, Bobby Legaspi.
Kini human si Legaspi nibutyag nga gihunong ni Gobernador Hilario Davide III ang dalaw sa mga piniriso sa Cebu Provincial Detention and Rehabilitation Center (CPDRC) tungod sa text message sa igsuon niini nga si Leodegreco “Greco” Sanchez nga naa sulod sa prisohan.
Si Sanchez nihulagway nga “very reckless statement” ang pamahayag ni Legaspi.
“Don’t blame other people for your incompetence to clean-up CPDRC. While I confirmed Greco’s cellphone messages but that should not merit your blaming him for suspending the entire dalaw because he texted me,” matud ni Sanchez.
Giklaro sa kanhi bokal nga ang ilegal nga drugas maoy panginabuhi sulod sa prisohan.
“These inmates caught with drugs are not even punished...why?...a possession of a single cellphone already can cause the suspension of the entire dalaw of 3000 inmates? I felt so offended by his reckless statement,” dugang ni Sanchez.
Si Sanchez niadto sa buhatan sa gobernador kagahapon diin iyang gikaestorya si Legaspi.
Si Legaspi kinsa sakop sa CPDRC Task Force ang wala na lang moluwat og pamahayag sa mga pagsaway ni Sanchez. Matud ni Legaspi nga makighinabi siya kang Audesti Miguel, ang assistant jail warden, aron pag-evaluate kung hangtud kanus-a ang suspension sa dalaw. (BANAT NEWS)