CEBU, Philippines - Usa ka 23-anyos nga lalaki ang nagtingkagol sa Talisay City detention cell human masakping nagluklok og armas didto sa sitio Rattan, barangay Tanke, sa maong dakbayan.
Kini samtang ang mga polis nagpahigayon og follow-up operation bahin sa carnapping sa sitio Rattan kagahapon.
Ang suspetsado mao si Eugene Salibay, residente sa maong dapit kinsa naimbargohan og usa ka kalibre .45 nga pistola, nga may usa ka magazine nga adunay sulod nga lima ka mga buhing bala ug tulo ka mga kabhang sa nahisgutang kalibre.
Si Senior Inspector Richard Gadingan nga nahinabi sa Banat News kagahapon mibutyag nga miadto sa lugar ang kapolisan sa laing tumong.
Apan sa didto na sila, nasugatan nila ang suspek nga nagsakay og motorsiklo nga kolor itom nga Rusi nga wala’y plaka hinungdan nga ila kining gisita.
Matud ni Gadingan nga si Salibay wala’y nahatag nga mga dokumento sa maong motorsiklo ug nasakpan usab nila kining nagluklok sa nahisgutang armas nga wala’y lisensiya hinungdan nga ila kining giaresto.
Ang suspetsado gipaubos sa tactical interrogation kagahapon ug gisusi usab ang background niini.
Dugang ni Gadingan nga si Salibay giisyuhan nila og Temporary Operator’s Permit tungod sa pagmaneho niini sa motorsiklo nga wala’y plaka ug mag-atubang usab siya og kasong paghupot og armas ug kalapasan sa gun ban.
Sa pagsaulog sa Sinulog gideklara sa kapolisan sa rehiyon nga gipatuman ang gun ban alang sa pagmentinar sa kahusay ug kalinaw. (BANAT NEWS)