Mga drayber sa Cere Bus paseminaron og road safety

CEBU, Philippines - Gimandoan sa Land Transportation Franchising and Regulatory Board-7 ang tanang mga drayber sa Vallacar Transit Inc. nga maoy operator sa Ceres Bus Liner nga mopailawom sa road safety seminar.

Matud pa ni LTFRB-7 hearing officer Edwin Antepuesto sa hearing nga gipahigayon kagahapong adlawa nga angayan seminaron ang maong bus company human ang usa niini ka bus naaksidente sa Badian, Cebu.

Ang maong aksidente nikalas sa duha ka kinabuhi ug 32 niini ang nangaangol.

Matud pa ni Erwin Alivio, ang liaison officer sa VTI nga nakapahigayon na og road safety seminar ang ilang mga draybers sa nilabay na nga mga katuigan.

Sumala pa ni Alivio nga wala siya nakahibalo kung asa gikan ang maong bus sa dihang naaksidente kini ug wala pa sad siya nasayod kung unsa na ug pila na ang nahatag nga pinansiyal ngadto sa mga biktima.

Atol sa maong hearing, dismayado si Antepuesto kay tataw ug klaro sa ilang order nga magdala ang kumpaniya og mga dokumento apan wala gyud kini matuman.

"These are vital documents unya you came here unprepared. You do not even know asa gikan ang maong bus ug unsa nay natabang ninyo sa mga biktima," matud pa ni Antepuesto.

Sa nahinumduman, niluwat na og 30 ka adlaw nga suspension order sa prangkisa sa maong bus, diin napulo ka bus ang nalakip sa maong prangkisa ang dili una pabiyahion.

Matud pa ni Alivio nga sunod semana ilang isumitir ang mga dokumento nga gipangayo sa LTFRB-7.

"Busy pa man gud ang among finance manager ug company nurse sa pag-atiman sa mga biktima sa hospital. Sila gyud ang nasayod kung unsa na ang natabang sa mga biktima," dungag pa ni Alivio. (Mitchelle Palaubsanon)

Trans Asia 5 gisuspenso sa Marina-X

 Ang Maritime Industry Authority-X  misuspenso sa Passenger Ship Safety Certificate sa Trans Asia 5, human kini napagngan sa makina niadtong Domingo samtang kini naglawig gikan sa Cagayan de Oro padulong sa Cebu City.

Matud pa ni Jose Cabatingan, ang tigpamaba sa MARINA-7 nga ang ilang opisina sa Cagayan de Oro mao ang niisyu sa maong suspensiyon.

Si Abner Llenos, ang tigpamaba sa Trans Asia nikumpirmar nga nadawat nila ang maong order kagahapon adlawa.

Sa maong order, matud pa ni Llenos nga ayuhon gayud nila ang naguba nga parte sa makina, sa dili pa kini tugutan nga makalarga og usab.

Ang Trans Asia 5 napugos og balik sa Cagayan de Oro City tungod sa "engine trouble" sa dihang mopadulong na unta kini sa Cebu City niadtong Domingo.

Ang barko gipaabot nga modunggo alas-6 sa buntag sa Cebu City niadtong  Lunes sa buntag apan pag-abot sa tungod sa isla sa Siquijor napagngan kini og makina.

Ang MV Asia Pacific, ang sister ship misuway og rescue sa Trans Asia 5 apan naputol ang pisi niini sa dihang giguyod na ang maong barko.

"At 10:00 am today, naabot ang barko sa Cagayan de Oro port. We opted nga adto na lang modunggo instead sa Cebu City kay mas duol man ang sa Cagayan," matud pa ni Llenos kagahapon.

Sumala pa ni Llenos, luwas ang tanang 677 ka mga pasahero ug 71 niini ka mga crew apil na mga interns.

Dungag pa ni Llenos nga adunay mga pasahero nga nagpa-refund sa ilang mga tickets samtang ang uban magpaabot lang sa Trans Asia 9 nga mobiyahe karong alas 8 sa gabii gikan sa Cagayan de Oro padulong sa Cebu City.

"Those who will wait for Trans Asia 9 will be allowed to stay and sleep at Trans Asia 5. We will be providing them meals until makasakay sila," dungag pa ni Llenos. (BANAT NEWS)