Utol dedbol sa bugbog ng kuya

MANILA, Philippines — Isang 27-anyos na lalaki ang nasawi nang bugbugin ng kanyang nakatatandang kapatid matapos silang magkasagutan sa isang inuman sa Tondo, Manila kamakalawa.

Nasawi habang nilalapatan ng lunas ng mga doktor ng Gat Andres Bonifacio Memorial Medical Center ang biktimang si alyas ‘Onin,’ ng Parola Compound, Tondo dahil sa matinding pinsalang tinamo sa kanyang ulo at katawan.

Agad naman naaresto ang suspek na si alyas ‘Kulas,’ 54, na nakapiit na ngayon matapos kasuhan ng pagpatay sa piskalya.

Sa ulat ng Manila Police District (MPD)-Homicide Section, bago naganap ang krimen, alas-3:15 ng madaling araw sa Area H, Gate 19, ng Parola Compound, Tondo ay masaya pang nag-iinuman ang magkapatid.

Gayunman, sa ‘di pa malamang kadahilanan ay nagkaroon umano ng mainitang pagtatalo ang mga ito na nauwi sa pambubugbog.

Sa tindi ng tinamong bugbog ay nawalan ng malay ang biktima at isinugod sa pagamutan ngunit binawian din ng buhay.