Condo fire: 2 babae na kasambahay patay
MANILA, Philippines — Dalawang babae na kasambahay ang nasawi nang sumiklab ang isang sunog sa isang condominium unit na matatagpuan sa Binondo, Manila, sa kasagsagan ng Chinese New Year kahapon ng madaling araw.
Tumanggi muna ang mga otoridad na pangalanan ang dalawang biktima na babae na isang 31-anyos at 24-anyos.
Sa ulat ng Manila Bureau of Fire Protection (BFP), alas-3:25 ng madaling araw nang maganap ang sunog sa Unit 35-A na matatagpuan sa ika-35 palapag ng 56-storey na Anchor Sky Suite sa Ongpin St. sa Binondo at sinasabing inookupa ng isang Hanshong Chua.
Halos katatapos lamang umano nang pagdiriwang para sa pagsalubong ng Chinese New Year at nasa kasarapan na ng tulog ang mga residente nang sumiklab ang sunog.
Una umanong nagising ang lalaking may-ari ng unit nang magsimula ang sunog.
Nakahingi naman ito ng tulong sa mga bumbero, sanhi upang maisalba ang kanyang dalawang kaanak.
Gayunman, bigo ang mga otoridad na mailabas pa ang dalawa nilang kasambahay, na kapwa binawian ng buhay.
Ayon sa mga otoridad, umabot lamang sa unang alarma ang sunog bago tuluyang naapula, alas-4:51 ng madaling araw.Inaalam pa ang pinagmulan ng sunog na tumupok sa tinatayang aabot sa P4.5 milyong halaga ng mga ari-arian.
- Latest
