Tinulisokay sa baha
Nagkalainlain ang mga rason nga gilista sa mga ahensiya ug mga opisyal sa gobyerno sa sunudsunod nga dakong baha sa Metro Manila, Luzon ug Mindanao tungod sa mga bagyong Butchoy ug Carina nga nipakusog sa Habagat:
•Gibasol sa Philippine Atmospheric, Geophysical and Astronomical Services Administration (PAGASA) ang mas daghang uwan nga gibubo sa super typhoon Carina nga nasamotan sa pagkusog sa Habagat;
•Gitulisok sa Department of Public Works and Highways (DPWH) ang paspas nga pagburot sa populasyon, nga wa maapas sa kapasidad sa karaan nga drainage system;
•Gibasol sa Department of Environment and Natural Resources (DENR) ang pagkaupaw sa kabukiran ug pagsemento sa patag, maong ang uwan di na masuyop sa yuta;
•Gitulisok sa Department of Interior and Local Government (DILG) ang pag-awas sa mga suba nga nahimong mas gamay ug mas mabaw tungod sa pagtugot sa local government units (LGUs) ug nasudnong mga ahensiya sa pagtukod sa buildings ug kabalayan sa mga tampi ug bisan sa tunga-tunga; ug
•Gibasol ni Presidente Ferdinand Marcos Jr. ang climate change ug ang pataka nga paglabay sa mga molupyo sa ilang basura.
***
Sakto ang tanan nilang rason. Sa lapad nga pagbaha ug pagdahili sa yuta sa Mindanao sa nangaging mga semana ug sa makalilisang nga baha ug pagdahili sa yuta sa Metro Manila ug sa Luzon sa niaging mga adlaw.
Samang mga rason ang niresulta sa pagbaha sa bagyong Ondoy sa Metro Manila niadtong 2009 ug sa mga baha sa Sugbo ug Kabisay-an ug Davao ug sa Mindanao sa nangaging tuigan. Way bisan usa nila nga nisuway pagpasabot nganong bisan nahibaw-an nang rason wa man g’yud masulbad ang baha hangtod karon.
***
Way bisan usa nila nga naghisgot sa kahigayonan nga gikawat ang binilyon ka pesos nga gigahin para sa flood control projects. Sa duha ka tuig sa administrasyong Marcos, usa ka bilyon ka pesos nga gahin sa DPWH kada adlaw, way labot ang binilyon ka pesos sab sa LGUs, batok sa baha.
Daghan untang nahinangop sa imbestigasyon sa Kongreso nganong nagkagrabe ang mga baha. Hangtod nga naamgohan sa mga magbubuhis nga ang mga mangimbestigar mao ra sab diay ang nanglista sa flood control projects nga wa igkita.
- Latest
