ICC dedesisyunan apela ng Pinas vs drug war probe sa Hulyo 18
MANILA, Philippines — Nakatakdang magpataw na ng desisyon ang appeals chamber ng International Criminal Court (ICC) sa apela ng gobyerno ng Pilipinas na ihinto na ang imbestigasyon sa ‘war on drugs’ na ikinasa sa administrasyon ni dating Pangulong Rodrigo Duterte.
“Judgment in the above appeal will be delivered in open court on Tuesday, 18 July 2023 at 10h00,” pahayag ng appeals chamber.
Sinuspinde ng ICC ang imbestigasyon sa drug war noong Nobyembre 2019 makaraang magprisinta ang gobyerno ng Pilipinas na magsasagawa ng sariling imbestigasyon ukol sa libo-libong napaslang sa mga operasyon kontra iligal na droga.
Ngunit nang matagpuan na hindi umano sapat ang ginawang imbestigasyon at prosekusyon ng gobyerno ng Pilipinas, itinakda ng ICC pre-trial chamber na ituloy ang kanilang imbestigasyon nitong nakaraang Enero.
Dito umapela noong Marso ang Pilipinas sa ICC na baligtarin ang kanilang desisyon kung saan iginigiit na walang hurisdiksyon ang tribunal sa bansa makaraang bumitiw na ang Pilipinas sa pamumuno ni Duterte sa Rome Statute noong Marso 17, 2019.
Ibinasura ito ng ICC nitong Marso 27.
Samantala, sinabi ni Solicitor General Menardo Guevarra na palaging may posibilidad na ma-indict ang sinuman kung may sapat na ebidensya ang mga prosecutor ng ICC ukol sa mga pagpaslang na nangyari kaugnay ng paglaban sa iligal na droga ng administrasyong Duterte.
“If it is dismissed, the ICC prosecutor will be authorized to resume his investigation into the Philippine situation and he may indict certain individuals based on whatever evidence he may be able to gather,” saad ni Guevarra.
Sa opisyal na tala ng gobyerno, nasa 6,200 ang nasawi sa mga ikinasang police operations noong panahon ni dating Pangulong Duterte, habang sa tala naman ng mga human rights groups ay aabot umano ito sa 12,000 hanggang 30,000.
Ngunit iginiit ni Guevarra, dating kalihim ng Department of Justice (DOJ), na patuloy ang mga institusyon ng bansa sa imbestigasyon at prosekusyon laban sa mga pag-abuso sa mga police operations.
“We can discharge this responsibility with or without the ICC,” giit niya.
Pero naniniwala pa rin si Guevarra na malaki ang tsansa ng Pilipinas na makakuha ng patas at paborableng desisyon sa ICC tribunal.
- Latest
