EDITORYAL — Kinsay maapektahan?

Aron pagpaabot sa ilang gibating kasagmuyo, ang mga supporter ni kanhi presidente Rodrigo Duterte nga mga OFWs sa nasud sa Croatia nipahibalo nga mopatuman sila og usa ka semanang “no remittance.”

Ang ipasabot niini, dili sila mopadala og kwarta dinhi sa ilang mga kabanay sa Pilipinas.

Makatandog sa kasingkasing kining gipakitang lunod-patay nga suporta sa Maisug Croatia, gusto nilang mapugos ang gobiyerno nga papaulion dinhi sa nasud si Duterte kinsa napriso karon  sa detention center sa International Criminal Court sa Netherlands tungod sa kasong crime against humanity.

Tinguha sa grupo nga maapektahan ang ekonomiya sa nasud pinaagi niini kay dako ilang pagtuong dako sila og tampo sa ekonomiya sa Pilipinas.

Apan makaapektar ba gyud kung sila lang didto sa Croatia ang mo boykot?

Tinuod milyones dolyares ginapadala dinhi sa Pilipinas sa OFWs, apan para man sa ilang pamilya. Tingali kung tanang kapin usa ka milyong OFWs apil mga Filipino seamen sa overseas mosanong dunay gamay nga epekto, pero dili man tanang OFWs ug seamen supporter ni Duterte.

Unsaon nalang man ang mga OFWs nga mga katabang, nga maoy pinakadaghang nanarbaho sa abroad? Gagmay ra man na sila og sweldo ilabi na ang naa sa Middle East ug maoy gisaligan sa ilang mga pamilya dinhi, mosanong kaha sila para kang Duterte?

Kinsa man kahay  maapektahan og maayo, ang mga opisyales sa Malacañang o ang mga kabanay sa mga OFWs?

Usa pa, unsa may labot sa ICC og magutman ang mga kabanay sa OFW dinhi o sa ekonomiya sa Pilipinas kun matandog man?