Cardinals tumatag sa No. 2 spot
MANILA, Philippines — Dumiretso ang Mapua University sa ikatlong sunod na ratsada matapos talunin ang Letran College, 86-78, sa second round ng NCAA Season 100 men’s basketball kahapon sa Filoil EcoOil Center sa San Juan City.
Humakot si Chris Hubilla ng muntikang triple-double sa 19 points, 10 rebounds at 9 assists para sa 9-3 record ng Cardinals sa ilalim ng lider na St. Benilde Blazers (9-2).
Nagdagdag si JC Recto ng 14 markers, habang may 13 points si John Jabonete.
Laglag ang Knights sa kanilang ikatlong dikit na kamalasan para sa 6-6 baraha.
Dikit ang laro sa halftime, 44-44, hanggang nakalayo ang Mapua sa fourth period, 77-66.
Hindi na ito napababa ng Letran.
Sa unang laro, kinumpleto ng nagdedepensang San Beda University ang elimination sweep sa University of University of Perpetual Help System DALTA, 57-53.
Bumanat si Yukien Andrada ng 21 points kasama ang limang triples para sa 8-4 baraha ng Red Lions.
Bigo ang Altas sa hangad na back-to-back wins at nadulas sa 5-7.
“I think we limited them to seven points and that’s what fueled ‘yung offense namin,” ani San Beda mentor Yuri Escueta.
Nagdagdag si big man Bismarck Lina ng siyam na marka, habang may walong puntos si Jomel Puno para sa Red Lions na kinuha ang 44-31 abante sa third period.
Ito ay matapos ang maliit nilang 29-26 halftime lead sa Altas.
Nakadikit ang Perpetual sa 50-54 sa nalalabing 1:28 minuto ng fourth quarter kasunod ang tres ni Penny Estacio na naglayo sa San Beda sa 57-50.
- Latest
