Lillard nayayay, dili na makaduwa ning season
CEBU, Philippines — Human ni Victor Wembanyama sa San Antonio Spurs, lain na sab nga NBA player ang na-diagnose nga dunay blood clot.
Kini mao si Milwaukee Bucks star Damian Lillard, nga nakitaan og blood clot sa tuo niyang bagtak.
Tungod niini, ang 34-anyos nga si Lillard dili na makaduwa pa sa nahibiling bahin ning season aron maka-pokus sa iyang pagrekober.
Ang Bucks namahayag nga si Lillard gipaubos na karon sa medikasyon.
"Damian's health is our No. 1 priority," matud pa ni Bucks general manager Jon Horst sa usa ka opisyal nga pamahayag.
"We will support him as he moves through this weekly process of strict criteria to ensure that it is safe for him to return to play."
Ang Milwaukee ikalima karon sa Eastern Conference ug dako'g tsansa nga makaangkon og awtomatik nga luna sa playoffs uban ang 40-31 rekord.
Apan usa ka dakong hagit ang ilang sagubangon sa umaabot kay wala si Lillard, nga mi-average og 25 puntos, 4.7 rebounds ug 7.1 assists ug lig-on nga katumpang sa alas nilang si Giannis Antetokounmpo.
- Latest
