Nakahakot og medalya sa CVIRAA hatagan og cash incentives
CEBU, Philippines — Gi-anunsyo ni Cebu City Mayor Raymond Alvin Garcia nga makadawat og cash incentives ang mga medalist sa Cebu City Niños nga nag-representar sa Central Visayas Regional Athletic Association (CVIRAA) sa Bayawan City sa Negros Oriental. Gihatagan og maayong dungog sa Niños ang dakbayan human nga gideklarar nga overall champion diin nakalangkat kini og 105 ka mga gold medal, 89 ka silver medal, ug 73 ka bronze medal. Ang ilang kadaugan sa CVIRAA maoy tulay aron nga makasalmot sa 2025 Palarong Pambansa sa Ilocos Norte. Ang gold medalists makadawat og P5,000; ang silver medalist makawat og P3,000, ug ang bronze medalist makadawat og P2,000.
Alang sa team events, ang gold medal teams makadawat og P10,000; ang silver medalists makadawat og P7,000, ug ang bronze medalists makadawat og P5,000.
Giklaro ni Garcia nga makadawat sab og cash incentives ang mga coach sa mga atleta.
Madawat sa mga atleta ang ilang cash incentives kung mahuman na og proseso ngadto sa Local School Board. Gipadayag ni Garcia ang iyang kalipay gumikan kay adunay mga atleta nga nagpasalamat kaniya tungod kay sa pila ka tuig na niini nga misalmot og CVIRAA, karon pa kini nakadawat og cash incentives gikan sa kagamhanan. Dugang pahalipay nga idalit ni Garcia mao ang magpahigayon sab og thanksgiving party alang sa mga atleta.
- Latest
