Sen. Go aprub ang ‘expanded PhilHealth package’ sa animal bite victims

MANILA, Philippines — Aprub kay Senator Christopher “Bong” Go ang expanded Animal Bite Treatment (ABT) package na iniaalok ng PhilHealth sa pagsasabing ito’y napapanahon dahil sa inaasahang pagtaas ng kaso ng mga kagat ng hayop ngayong hot and dry season.

Bilang tagapangulo ng Senate committee on health, binigyang-diin ni Go na mahalaga ang tamang medical care sa mga kagat ng hayop, lalo sa mga kanayunan at mga lugar na kulang sa serbisyo.

Itinaas kamakailan ng PhilHealth ang ABT benefit package nito sa P5,850, mula sa P3,000 para sa mas komprehensibong coverage sa mga biktima ng animal bite—kabilang ang post-exposure prophylaxis, wound care, rabies vaccine at immunoglobulin, tetanus shots, atantibiotics.

“Kapag may nakakagat na hayop, ‘wag na tayong maghintay pa ng komplikasyon. Magpatingin agad sa health center o animal bite treatment center, at gamitin ang benepisyong iniaalok ng PhilHealth,” sabi ni Senator Go.

Ang increase ng ABT package ng PhilHealth ay sa gitna ng babala ng health experts na posibleng pagtaas ng mga insidente ng animal bites sa summer months kung kailan maraming bata ang naglalaro habang ang mga hayop ay naliligalig sa init.

Ayon sa PhilHealth, mahigit 700 accredited ABT providers sa buong bansa ang may kakayahang mangasiwa ng paggamot at i-expand ang network nito.

Mula Enero 1 hanggang Marso 1 ngayong taon, nakapagtala na ang Department of Health (DOH) ng 55 pagkamatay na nauugnay sa rabies, isang sakit na may 100% fatality rate kung hindi maagapan.