CESAFI finals: USJ-R coach Cadavis adunay misyon batok sa kanhi niya team

CEBU, Philippines — Si University of San Jose-Recoletos (USJ-R) Baby Jaguars head coach Julius Cadavis mopas-an og mabug-at nga misyon sa giatngan nilang sangka sa Finals batok sa three-time defending champion Sacred Heart School-Ateneo de Cebu (SHS-AdC) Magis Eagles sa Cebu Schools Athletic Foundation, Inc. (CESAFI) Season 24 men's basketball tournament.

Ang Game 1 sa ilang best-of-three series alang sa korona sa juniors division gikatakda sa alas 6:45 sa gabii karong Miyerkules, Disiembre 4, diha sa Cebu Coliseum.

Nagpabiling kalmado taliwala sa presyur, si Cadavis naglantaw ngadto sa unahan uban ang tumang kahinam nga makaharong ang kanhi niya tea ug coach nga si Rommel Rasmo, nga way duda nakatabang paghulma kon unsa na siya karon.

Si Cadavis kanhi nakaduwa sa Magis Eagles nga nahimong back-to-back national champions sa NBTC niadtong 2011 ug 2012 ubos sa paggiya ni Rasmo.

Sa maong mga higayon, si Cadavis maoy gipasidunggan nga Most Outstanding Player hinungdan nga naapil siya sa listahan sa 13 sa labing ngilngig nga NBTC players kauban silang Carl Tamayo, nga nahimong miyembro sa Gilas national team, ug Fil-Am Jalen Green, nga samtangang sakop sa Houston Rockets sa NBA.

Karon, ang 29-anyos nga si Cadavis makig-engkwentro batok sa kanhi niya magtutudlo uban ang tinguha nga sakmiton ang butang nga napakyas siya pagkab-ot sa iyang panahon sa high school - ang tropeyo sa kampiyonato.

"Excited ko kay we will be facing my former team and former coach, coach Rommel (Rasmo). It will be a good match-up kay defending champion sila, naa na sila championship experience sa CESAFI unya rookie year nako," matud pa ni Cadavis, nga miyembro sa Arellano Chiefs nga nakatikang sa NCAA Finals sud sa duha ka higayon niadtong 2014 ug 2016.

Nag-atubang og malisud nga tahas pagbisbis sa 22 ka tuig nilang huwaw sa titulo, si Cadavis mahimong mokuha og dugang motibasyon gikan sa Baby Jaguars isip bugtong team nga nakapilde sa Magis Eagles ning season pinaagi sa 62-40 nga demolisyon niadtong Septiembre 28.

"Hopefully, everything will go well. We will play our hearts out and try to end the 22 years title drought of USJ-R," dason pa ni Cadavis. "Pero we will take it one game at a time gihapon. With the help of our assistant coaches and coach Melo Banua in preparing the team for this series, we will be ready." Ang una ug bugtong higayon nga ang Baby Jaguars gikoronahang kampiyon sa CESAFI nahitabo dugay na kaayo niadto pang 2002.

"We want to express our appreciation to our team manager Francis Tolibas, Fr. Glynn Ortega, the Recoletos fathers, and the USJ-R community for their all-out support sa team. We do not mind the opinion of some USJ-R alumni who doubted us. We just think of these as encouragement para daugon jud namo ang series," panapos pa ni Cadavis.