Higit 5K pasaway na motorista sa Metro Manila, huli
MANILA, Philippines — Nahuli ng mga elemento ng Land Transportation Office-National Capital Region (LTO-NCR) ang higit sa 5,000 motorista na lumabag sa iba’t ibang batas trapiko sa ikatlong quarter ng taong ito mula Hulyo hanggang Setyembre 2024.
Ayon kay LTO-NCR Regional Director Roque “Rox” I. Verzosa III, 5,769 drivers na nahuli dahil sa paglabag sa Traffic Code ay kinabibilangan ng pagmamaneho ng sasakyan na may defective accessories, devices, equipment o bahagi ng sasakyan, nagsuot ng tsinelas habang nagmamaneho, reckless driving, nagmamaneho na hindi dala ang kopya ng OR/CR ng sasakyan, obstruction, nagmamaneho na walang lisensya, hindi otorisadong magpalit ng kulay ng sasakyan, illegal change of body, excess passengers at disregarding traffic signs.
Marami rin ang nahuli dahil sa hindi pagsusuot ng seat belt at standard protective motorcycle helmet, paglabag sa Children Safety on Motorcycle Law (R.A. 10666) at paglabag sa Anti-Distracted Driving Act (R.A. 10913).
Bukod rito, sa kaparehong period, mayroon pang 727 drivers naman ang nahuli ng mga LTO-NCR deputized personnel mula sa DPWH at PNP dahil sa iba’t ibang paglabag sa batas trapiko tulad ng paglabag sa Republic Act 8794 (Motor Vehicle User’s Charge), R.A. 8750 (Seat Belt Use), R.A. 10054 (Motorcycle Helmet Law), unregistered motor vehicles na bahagi ng No Travel No Registration Policy ng ahensiya at iba pang offenses.
- Latest
