OBO sa Cebu City nisaka ang kita karong tuiga
CEBU, Philippines — Ang Office of the Building Official sa Dakbayan sa Sugbo nisaka ang ilang kita gikan sa buwan sa Enero hangtud sa Agosto karon tuiga itandi sa susamang buwan sa nakalabay’ng tuig.
Ang OBO nakakolekta og P107milyones ikomparar sa tuig 2023 nga P101milyones.
Matud sa pangulo sa OBO Architect Florante Catalan nga ang paspas nga proseso sa ilang buhatan sa mga permit maoy hinungdan sa pagsaka sa ilang kita.
Gipadayag ni Catalan nga gipasayon lang nila ang pagkuha sa building permit ug bisan unsa nga permit diin basta kompleto lang sa tanang rekisitos ilaha dayon kining aprobahan hinungdan nga nisaka ang ilang kita.
Matud usab ni Catalan nga ang pagpuno nila sa personnel lakip ang paggamit sa OBO-IS Version 3 nakapadali sa paglihok ug pagkuha sa building permit diha sa ilang buhatan hinungdan nga dako ang ilang pasalamat niini ni Acting Cebu City Mayor Raymond Alvin Garcia.
Ang pagdugang og personnel sa OBO nakatabang kini aron mapadali ang inspection, pag serve sa notisya, pagpahigayon sa pagsusi sa mga structure sa Dakbayan sa Sugbo.
Gilaoman ni Catalan nga makab-ot nila ang P160 milyones nga target revenue karong tuiga. (BANAT NEWS)
- Latest
