Parehong nagpa-epal

Gipahinumduman ni Sta. Rosa City Representative Dan Fernandez ang abogado ni Pastor Quiboloy nga si Ferdinand Topacio nga magmabinantayon kini sa iyang mga pamahayag ug likayan niini ang pagpasiatab.  Gihulagway man gud ni Topacio nga “epal” ug pamolitika lang lang ang pamahayag ni DILG Secretary Benjamin Abalos nga nadakpan ang pangulo sa KOJC ug nga wala kini mosurender.  Mora’g parehas ra man nga ni-epal ug nagpasiatab si Topacio ug si Abalos ni’ng kahimtanga bisan maingon nato nga aduna sila’y tagsa-tagsa ka hinungdan. Tinuod tingale ang panultihon nga, “Ang hambugero masilag gayod sa parehas niya’ng hambugero.” Muleeng!

“Zero-he na lang”

Dili igsapayan ni Bise Presidente Sara Duterte ang gihugon-hugon nga laraw sa mga kongresista nga dili hatagan og budget ang Office of the Vice President sa sunod tuig.  Dugang pa sa bise presidente, mahimo gihapon nga motrabaho ang iyang opisina bisan kon P1 lang ang budget nga igahin niini. Makapahinumdum sa anak sa akong silingan nga sa dihang gisuna sa iyang maestra kon ngano’ng wala siya motahan sa iyang test paper, mitubag lang ang bata nga, “Zero-he na lang ko Maam; mouli na ko kay gutom na.”  Pagkatoytoy!

One-strike policy

Misaad ang PhilHealth atol sa joint hearing sa Senado, nga wagtangon na niini ang ilang single confinement policy sa katapusan ni’ng bulan sa Septyembre.  Ubos sa maong polisiya, kon ma-admit pag-usab ang miyembro sa hospital sa sama’ng balatian sulod sa 90 ka adlaw, ang una’ng confinement lang ang bayaran sa PhilHealth.  Illogical ang maong polisiya kay adunay mga balatian nga mahimong magbalik-balik pagtakboy bisan sa tumang pag-amping.  Kini’ng “one confinement policy sa PhilHealth, makapahinumdum sa ulohan sa awit nga nagkanayon, “Kausa Nabasa ang Tubig.” Maayo tingale nga tawgon kini’ng maong polisiya nga “One Strike Policy.” Fezteleern!

Nagpabilin nga ubos

Dako ang pagtoo sa Alyansa sa mga Mamumuos sa Sugbo-Kilusang Mayo Uno nga dili mahatag ang gipangayo nila nga P150 nga wage increase dinhi sa Central Visayas, ug nga kon aduna ma’y usbaw sa suholan, gamay o daw mumho lang kini.  Sa hisgutanan sa wage increase, managsumpaki gayod ang mamumuo ug ang mga magpapatigayon sa ilang baruganan.  Ni’ng kahimtanga, nangomedya na lang ang akong amigo sa pag-ingon nga, “May’gani wa pa gyud mosaka ang akong sweldo.  At least, bisan sa pagsaka sa tanan presyo, naa pa gyu’y nagpabilin nga ubos.” Madahaan!

Naglurat ang pamolitika

Gihimug-atan ni Presidente Bongbong Marcos atol sa pagpanghatag sa PCSO sa 129 ka mga ambulansya ngadto sa mga kagamhanan’g lokal nga ang serbisyo sa panglawas kinahanglan nga ilingkawas sa pamolitika.  Maayo unta kon tumanon kini sa atong mga lokal nga opisyal.  Baniog ang mga panghitabo diin ang mga kabos nga nanginahanglan dili hinoon maserbisyohan sa ambulansya kay gigamit kini sa mga kaalyado sa ilang pagpangaligo sa dagat o paglulinghayaw.   Bisan sa pahimangno sa presidente, ang kamatuoran nga adunay pamolitika sa mga lokal nga opisyales nagalurat kanato nga daw mata sa langgam pungaw. Saoonz!