Pagtrabaho sa condo diha sa Hipodromo gipahunong

CEBU, Philippines — Gipahunong ang pagtrabaho sa bahin sa usa ka condominium sa Brgy. Hipodromo human sa giingong adunay natagak nga aluminum platform ug didto nitugpa sa usa ka balay.

Bisan pa man og walay natala nga naangol sa maong insidente niadtong Agusto 26, 2024, nimando ang Office of the Building Official (OBO) nga undangon una ang pagtrabaho sa dapit diin gikan ang platform samtang wala pa nakabutang og safety net ug uban pa nga mga paagi sa pagsiguro sa kaluwasan sa mga nagpuyo.

“Atong nakita ganina medyo bug-at, di pwede… usa lang ka tawo, dapat duha gyud ang magkuan…. Mao na ang nahulog didto sa ubos,” suma pa sa pangu as OBO nga Arch. Florante Catalan human sa gipahigayon nga inspeksyon.

Matud pa ni Catalan, kun adunay pa’y safety net ang edepisyo nga mo-abong sa mga mangahulog, dili unta malahos sa ubos ang pagkatagak sa bisan unsa nga mga butang.

“Wa man ta nagkuwang sa ilaha, nag-remind gyud ta pirmi sa mga contractors, mga construction, nga ayaw gyud ninyo tihika ang safety… dapat na’y safety officer at the site. Dapat naa pud gyud toy mga safety measures sa site para malikayan ang ingon ani nga sitwasyon”. suma pa ni Catalan. 

Sigon sa pakisusi, ikaduha na nga higayon nga adunay natagak gikan sa 36 andanas nga edepisyo. Sa unang higayon, giingon nga usa ka signage sa boom sa tower ang natagak nga maoy hinungdan nga gipahunong usab sa OBO ang pagtrabaho sa building. — MEL BANAT NEWS