Alang sa kaluwasan

Gianunsiyo ni Cebu City acting Mayor Raymond Alvin Garcia nga ibalik na ngadto sa Cebu City Sports Center ang pagpahigayon sa Sinulog Festival sa sunod tuig. 

Ang maong desisyon gisuportahan usab ni Gobernador Gwendolyn Garcia kinsa hagbay rang nagyam-id sa lakang ni Mayor Michael Rama nga adto gayud sa South Road Properties ipahigayon ang Sinulog.  Hinuon, alang kanako, mas maayo nga adto na lamang sa SRP ang permanenteng venue sa Sinulog.  

Ang Sinulog maoy labing dako ug nabantog nga selebrasyon sa Sugbo. Kini nga piyesta maoy usa sa nakapalig-on sa kultura ug relihiyosong pagtuo sa mga Sugboanon ug mga bisita gikan sa nagkalainlaing bahin sa kalibotan.

Apan, uban sa kadako ug kadaghan sa mga motambong, ang pagmintenar sa kaluwasan ug seguridad sa mga partisipante ug mga manan-aw mahimong usa ka dakong hagit. Karong tuiga ug sa miaging tuig, gipahigayon ang Sinulog sa SRP nga nagpakita og daghang bentaha sa aspeto sa seguridad. Ang SRP adunay limitado nga mga entry ug exit points, nga nagpasabot nga mas sayon ug mas dali ang pag-monitor ug pagkontrol sa mga tawo ug mga sakyanan.

Kini nga setup naghatag og mas maayo nga kahigayonan alang sa mga kapolisan ug mga security personnel pagpadali ang ilang pagresponde sa bisan unsang emerhensiya.

Ang pagbalhin sa Sinulog sa SRP usab naghatag og mas lapad nga espasyo alang sa mga kalihokan. Kini nagpasabot nga mas daghan ang lugar alang sa mga partisipante ug mga manan-aw aron makalihok ug makalingkod nga dili maghuot.

Ang mas lapad nga espasyo naghatag usab og kahigayonan alang sa mga emergency vehicles nga makasulod ug makagawas sa lugar sa dali nga paagi kung adunay mga insidente nga kinahanglan og dali nga pagresponde.

Dugang pa, ang SRP adunay mga designated parking areas nga naghatag og mas organisado nga sistema sa pagparada. Ang mga designated parking areas usab naghatag ug mas maayo nga seguridad alang sa mga sakyanan sa mga bisita. Ang pagpahigayon sa Sinulog sa SRP naghatag og mas maayo nga kahigayonan alang sa mga kapulisan ug mga security personnel aron mapadali ang pagresponde sa bisan unsang emerhensya. Busa, alang sa kaluwasan ug seguridad sa tanan, angay lamang gayud nga adto na sa SRP ipahigayon ang Sinulog. Kini naghatag og mas maayo nga kahigayonan alang sa usa ka hapsay ug malinawon nga selebrasyon.