PGT: Hugyaw nga mga talento giatngan

CEBU, Philippines — Dili gyud malilong sa mga hurado sa "Pilipinas Got Talent" (PGT) ang ilang paghinam-hinam nga makakita sa hugyaw nga talento sa mga Pinoy .

Ang mga hurado sa bag-ong season sa PGT kay naglangkob nila ni  Kapamilya superstar Kathryn Bernardo, award-winning actress  Eugene Domingo, heartthrob Donny Pangilinan, ug usa sa mga orihinal nga hurado nga si Freddie M. Garcia  nga nailhan sa kadaghanan isip FMG.

Atol sa media conference sa niaging adlaw , gibutyag sa mga hurado nga gipangita  gyud nila ang mga bag-ong  mugna nga pasundayag nga seguradong ikakugang sa kadaghanan.

Gibutyag ni Donny nga usa sa iyang gipangita ang pasundayag nga makapausab  gyud sa palibot sa natad sa kalingawan.

Alang usab kang Eugene , importante nga malingaw dayon ang tawo nga makakita sa pasundayag sanglit mao kini ang sentro sa maong programa.

Importante pud alang kang Kathryn ang orihinal nga mugna nga  idalit sa contestant .

Si FMG sa iyang bahin , dakong hagit alang kaniya ang pagpangita og presko nga mga estilo sa pasundayag  sanglit mao na kini ang ika-pito niya nga higayon nga nahimong hurado sa PGT.

Sa bag-ong  season sa PGT,  modugang usab sa kalingaw niini mao ang hosts nga sila si Robi Domingo ug Melai Cantiveros.

Gihatagan sila og gahom  nga makapislit sa   Golden Buzzer hangtod na sa  semi-finals.

Aminado si Robi nga na-pressure siya sanglit dili basta-basta ang nag-host sa maong programa kaniadto nga sila si   Billy Crawford ug  Luis Manzano .

Hinoun paningkamotan gyud nila ni Robi ug Melai nga makahatag og bag-ong flavor.

Sugdan ang kompetisyon  karong  Marso 29 ug 30 ug makita kini sa , Kapamilya Channel, Kapamilya Online Live,  ug A2Z , 7:15- 8:30pm matag Sabado ug Domingo. Sa TV5, makita kini sa 8:00- 9:15pm  matag  Sabado , 8:15-9:30pm matag Domingo .