Nataypan sa amiga

Dear Tito Miguel,

Ako diay si Jericho, taga Basak Pardo, Cebu City. Naproblema ko ron, kay ang akong amiga nga si Wynina kay niangkon nga duna siya'y fleelings kanako ug nisulti nga buhaton niya ang tanan aron magkauyab mi. Ako siya giprangkahan nga amiga ra gyud ang akong pagtan-aw niya. Seguro nadala siya sa akong pagka-sweet. Sa tinoud lang, sweet man ko sa tanan nakong friends. Wala nako damha nga ma-develop si Wynina nako. Bisan unsaon nako og pasabot, dili gyud siya maminaw uy. Moana raman siya nga maabot ra daw ang panahon nga maganahan ko niya. Unsaon mani nako? Dili ko ganahan nga magdahom siya. Maikog man sad ko kun ako siya nga likayan. Tambagi ko please, daghang salamat. - Jericho -

* * *

Jericho,

Kun dili ka molikay, samot siya magdahom nga duna siya’y mapaabot nimo. Wala ka maghisgot ngano magkita mo nga gusto na unta ka molikay apan maikog. Kun inyo naandan magkita mong duha, undangi na. Ingna busy ka o duna ka’y laing lakaw o kasabot. Sa maong paagi siya makaamgo nga kaniya wala ka’y plano.

Kun kuyog sa barkada, mahimo ra. Apan ayaw na’g sikit niya. Ibani imong pagka-sweet ka’y para niya dunay malisya. Kun imong ipadayon ang pagtagad nga mao’y nakapadahom niya, samot nga imo siyang gipaasa. Dili ka lung-an hangtod nga makuha ka niya.

Kun sa chat ra mo konektado, sayon ra kaayo. Kun maikog ka mo-block o unfollow, ayaw na’g tubay sa iyang mga pasumbingay. Kun mangumusta, tubaga. Apan ayaw na’g pun-i. Kay kun motaas inyong istorya, magdahom na sab siya, buot pasabot importante siya kanimo, imo gyud nga  gigahina’g oras. Imo na man siya nga giklarohan nga inyong gibati dili mutual, apan magsige gihapon siya’g dahom o handom, iyaha na na’ng problema. Ang pagklaro o paglikay niya igo na. Kun dili siya kasabot, likay lang hangtod nga maluya siya. Aron dili ka mahasol, kinahanglan dili ka mohatag sa higayon nga magkita mong duha. Wala ka kabantay, apan apil sa imong ka-sweet ang pagkamaikogon. Kun dili na nimo putlon, imong problema magpadayon. Gani, siya ang angay maulaw, dili ikaw.-Tito Miguel -

Magpatambag ka? Ipada kang Tito Miguel: 0991-318-9366