Bugno sa kama

Dear Tito Miguel

Maayong adlaw,  ako diay si Julia, taga  Catmon, Cebu. Naproblema bitaw ko , kay akong uyab  nga si  Niño John  ,perming wala'y gana sa pakighilawas. Laktod pagka-istorya, usahay rami makabugno sa kama.  Seguro, sa usa ka buwan, kausa ra namo mabuhat ang lawasnong kalipay. Apan dunay panahon nga wala gyud.  Sa time pa gyud nga magbuhat mi sa maong butang , na-feel nako nga murag napugos ra gyud siya. Dunay higayon nga ni-open up ko niya , pero mura ra gyud siya og wala , mag-change topic dayon. Ngano kaha ni siya Tito Miguel nu? Nagduda na hinoun nga basin dili babaye ang iyang gusto, basin lalaki pud nga sama niya ang iyang gipangita pero ako ranang panagna ha. Usa ka tuig kapin na diay ang among relasyon. — Julia

Julia,

Lagmit sakto imong duda, lalaki iyang gusto. Kasagaran sa manag-uyab o magtiayon,  lalaki ang agresibo sa kama. Labi na’g bag-o pa, way pili’g oras o lugar. Apan dili tanan, basin siya lahi sa kasagaran. Ang pakighilawas mora ra na’g kaon, duna’y dako’g kaon nga mora na’g wa’y ugma, duna’y ginagmay ra matagbaw lang dayon.

Kun gamay siya’g kaon, ayaw pugsa, kapila na nimo gihungitan di ba. Ang pangutana na lang makaagwanta ba ka’g wa’y kasawo. Igo na ba imong gugma. Kun dili, biya na, dili mo compatible sa kama. Kuwangan siya, basin ikaw sab nasobrahan. Lagmit hinuon mangita pa ka’g lain samtang kamo pa. Posible sab babaye iyang gusto apan dili ikaw. Wala siya’y gana kanimo mismo. Ayaw na pangutana, ang iyang pagbalibad ug paglihay sa istorya mao na’y makabungog nga tubag. Kun dili ka makadawat ana, biya na. Ayaw na istoryaha, molihay na sab unya. Ayaw na panamilit, pasagdi siya hangtod makaamgo nga ikaw nibiya na.

Kun matingala’g pangitaon ka, diha na siya istoryaha sa rason. Klarohi nga ikaw nagduda sa iyang pagkalalaki ka’y sa pakighilawas wala siya’y gana. Dili na importante ang iyang reaksyon, kun laki man siya o dili, wala gihapon siya’y gana. Kun kalit siya makighilawas, balibad. Dili siya sinsero, nahagit lang nimo. Kun dili ka pangitaon, aw klaro na kaayo nga kaniya wala ka’y angay paaboton. —Tito Miguel

Magpatambag ka? Ipada kang Tito Miguel: 0991-318-9366