Bag-ong single sa WetSlipperz ipalanog ugma

CEBU, Philippines — Gikatakdang ilusad ugmang adlawa, Disyembre 31, ang bag-ong awit sa WetSlipperz nga nag-ulohan og "Wala Na".

Nasayran nga taod-taod na kini nga giatngan sa fans sa maong grupo.

Madungog kini sugod ugma sa Spotify, Youtube Music ug ubang digital stores.

Kalabot kini  sa naputol nga relasyon  kun diin dunay  usa ka habig nga gustong makigbalik apan ulahi na ang tanan sanglit dili na intresado ang kanhi niya partner nga hulmaon og balik ang ilang napakyas nga  relasyon.

"Wala na, wala nata.Wala na, wala na'y kitang duha.Pangandoy nga napukan.

Nagsakit lang ang akong dughan," tipik nga linya sa maong awit.

Nagmalaumon ang maong banda nga makadawat og suporta ang ilang bag-ong single.

Ang kasamtangan nga mga miyembro sa WetSlipperz kay gilangkoban nila niGodjay Gorre (vocals), Emman La Victoria (backup vocals and bass guitar), Venz Aba (guitar) ug Adrianne Yu (drums).

Kahinumdoman nga unang nailhan sa kadaghanan ang WetSlipperz gumikan sa awit nila kaniadto nga "Bisan Pa".