Parade of Stars tututukan ng 3,000 marshalls, nagbebenta ng pekeng MMFF passes nayari sa entrapment operation

Ngayong araw na magaganap ang inaabangang #MMFF50 Parade Of Stars & Music Fest!

Yup hindi na lang siya basta Parade of Stars, may musicfest na pagkatapos ng parada ng brightest stars ng 50th Metro Manila Film Festival ngayong Dec. 22, Sabado, simula 2 p.m. na mag-uumpisa sa Kartilya Ng Katipunan hanggang Manila Central Post Office.

Tulad nga sa lumabas, walang magaganap na hagisan ng mga t-shirt, candy, cap, poster, etc. etc ngayong araw.

Katwiran ni MMDA Chair Don Artes, mahirap pag may inihagis na at bumagsak malapit sa float, baka lusubin. Mag-agawan, masagasaan pa. Kaya mahigpit aniya itong ipagbabawal, paliwanag pa ni Chair Artes sa media briefing last Dec. 18, sa MMFF Auditorium, New MMDA Bldg.

Karaniwang naghahagis ng poster, kalendaryo, kendi, t-shirt, mga souvenir cap at kung anu-anong giveaway ang mga artista mula sa float na inaabangan din ng fans tuwing may parada.

Matataong lugar din kasi ang dadaanan ng parade sa buong Kamaynilaan.

Kaya t 3,000 marshall ang ide-deploy sa lungsod ng Maynila. “Iyong usual na ginagawa natin na may nakapalibot kaming tao sa mga float para huwag dumugin, to avoid accidents,” katwiran pa ni Atty. Artes. “‘Pag ginawa po natin iyan, mahihirapan po kaming ikontrol ‘yung crowd na huwag lapitan ‘yung float. Dahil nga po may possibility po na magkaroon ng aksidente pag ganun.”

Nag-confirm ang mga bida ng pelikula ayon pa sa punong-abala sa 50th anniversary edition ng MMFF.

“Yes! Nag-confirm naman po lahat ng mga bida na dadalo po sila sa parade.”

Tho late si Piolo Pascual ng The Kingdom dahil manggagaling pa ang actor sa GenSan. Ihahagad na lang daw si Papa P mula sa airport para maka-participate sa Parade of Stars.

Ang cash prize naman para sa best float ay P200,000. “May mga nagsasabi na sa akin natalagang pinaghandaan nila ‘yung kanilang float. Talagang pabonggahan daw,” sabi pa ni Chair.

Samantala, humingi ng tulong ang Metropolitan Manila Development Authority sa Quezon City Police District-District Special Operations Unit sa pagsasagawa ng entrapment operation laban sa tatlong tao na iligal na nagbebenta ng mga complimentary MMFF tickets.

Meron daw 46 passes na naibenta sa pamamagitan ng Facebook sa halagang P1,300 hanggang P1,500 bawat isa.

Ang paunang transaksyon daw ayon sa statement ng MMDA ay ginawa sa pamamagitan ng online selling. At nagkita raw ang isa sa mga suspek at ang poseur buyer para sa ticket noong Disyembre 14 sa Quezon City. At ang ticket ay pinatunayan ng MMFF Secretariat na peke.

Dahil dito, isinagawa na raw ang entrapment operation upang mahuli ang unang suspek na kalaunan ay ibinuking na ang kanyang kasamahan at 40 passes na raw ang napigilang ibenta.

Nahuli na rin daw ang supplier ng pekeng passes.

“I strongly condemn the acts of these enterprising individuals who are using the Metro Manila Film Festival as a business venture by selling fake complimentary tickets.

“These passes are STRICTLY NOT FOR SALE and no persons or groups are authorized to distribute them for sales or any profiteering purposes.

“The three suspects have already undergone inquest procedure and will be charged with Estafa through Falsification of Public Documents in relation to R.A 10175 or the Cybercrime Prevention Act of 2012. They are now in the custody of the police.

“With this unfortunate incident, I urge the public not to patronize MMFF tickets sold online and instead report to us these unlawful activities.

“Anyone who will be caught selling or buying complimentary tickets shall be sanctioned in accordance with the law,” pagdidiin pa ni MMDA Chair.

Ayan ang linaw.  ‘Wag paloko dahil naka-hologram ang passes ngayon kaya madaling mahuli ang may hawak na pekeng passes.