Jessy magiging abala sa pulitika, balik-teleserye!
Tuloy na tuloy na ang inaabangang acting comeback ng Kapamilya star na si Jessy Mendiola sa pagbibida niya sa upcoming action-drama series ng ABS-CBN na Nobody.
Makakasama ni Jessy sa nakaka-intrigang proyekto tungkol sa katapatan at integridad ang lead star nitong si Gerald Anderson.
Huling nagkasama ang dalawa sa teleseryeng Budoy kung saan gumanap si Jessy bilang si Jackie na best friend at love interest ni Budoy (Gerald).
Ang Nobody ang unang TV project ng aktres pagkatapos niya muling pumirma ng kontrata sa talent management arm ng ABS-CBN na Star Magic noong Hulyo.
Ilan sa mga pinagbidahan niyang programa sa telebisyon ang Maria Mercedes, Sabel, Precious Hearts Romances Presents: Paraiso, at You’re My Home, at naging regular cast din siya ng comedy program na Banana Sundae. Huli siyang napanood sa teleseryeng Sandugo taong 2019.
Isa ang Nobody sa mga inaabangang Kapamilya serye na malapit nang ipalabas sa telebisyon. Pangungunahan ito nina Benedict Mique at Rae Red bilang direktor at iproprodyus sa ilailim ng JRB Creative Production.
Bukod kina Gerald at Jessy, makakasama rin sa programa si JC De Vera.
Tiyak din siyempre na magiging busy si Jessy sa kampanya para kay Luis Manzano na kumakandidatong Vice Governor ng Batangas.
Kuan... tumabo nang mahigit 15m views
Umani nang mahigit 15 million views at nagkaroon ng ilang trending episodes ang unang season ng ABS-CBN Bisaya talk show na Kuan On One, sa pangunguna ni Kuantie Melai Cantiveros, na mapapanood na ang second season simula Nobyembre 12 (Martes) sa ABS-CBN Entertainment YouTube channel at iWantTFC.
Sa Season 2 announcement ng show, inilahad ni Melai ang kanyang excitement sa paghahatid muli ng tuwa at lessons mula sa mga Bisaya celebrities.
‘‘Gusto kong ma-pickup ng viewers yung mga individuality ng in-interview na mga Bisaya celebrities and influencers. Na kapag na-touch mo kung saan sila nanggaling, makikita mo na normal lang silang tao, sobrang humble nila, at deserve talaga nila na maging idol natin,” sabi niya.
Nagpasalamat rin si Melai sa lahat ng positibong reaksyon at komentong natatanggap niya bilang solo host.
Dahil dito, muling magpapasaya si Melai kasama ang celebrity guests mula sa showbiz at music industry at sa drag, social media, at sports communities na may nakakatuwa at nakaka-inspire na mga kwento.
Huwag palampasin ang Kuan on One Season 2 na mapapanood na ngayong Nobyembre 12 (Martes) sa YouTube channel ng ABS-CBN Entertainment at iWantTFC. Available rin weekly ang extended scenes ng Kuan on One para sa Super Kapamilya Members sa ABS-CBN Entertainment YouTube Channel.
- Latest
