Nagparamdam ang ex-BF

Dear Tito Miguel ,

Maayong adlaw , ako diay si Kaye , taga Barangay Guadalupe, Cebu City . Tulo ka buwan na ang nilabay sukad nagkabulag mi sa akong ex-boyfriend nga si Johnny . Nagbulag mi tungod kay nasakpan nako nga nagkita-kita gihapon sila sa iyang ex-girlfriend. Apan  sa niaging adlaw, nagparamdam si Johnny dinhi kanako ug nisulti nga gihunong na niya ang pakigkita sa iyang kanhi uyab.

Ako daw ang iyang gipili ug nakaamgo siya nga love daw gihapon ko niya busa gusto siya nga magbalik mi . Sa tinoud lang,naa pako'y feelings ni Johnny . Apan duna pako'y kahadlok kay basin binuangan ko niya og balik kun pananglitan magbalik mi.

Magpatabang ko nimo Tito Miguel , unsa kaha ang angayan nakong buhaton ? Sakto ba nga magbalik mi ? —Kaye

* * *

Kaye,

Paminawa imong kaugalingon, unsa ang feelings para niya ang naa pa nimo karon? Kun nahigugma pa ka niya, mahimo nimo siya hataga’g ikaduhang higayon.

Total, ang relasyon sugal man. Tinuod, nibudhi siya kanimo kaniadto, lagmit iyang usbon, apan duna  pu’y purohan  nga dili na. Kun magpaabot ka’g lain, duna gihapo’y  purohan nga ikaw budhian. Kun nahigugma gyud ka, mahimo ka nga  mosugal ug mamasin nga dili na siya magbinuang. Apan ang pangutana, kaya ba nimo kalimtan ang iyang gibuhat? Kay apektado ang inyong relasyon kun sige lang ka’g duda ug pasangil niya, tungod lagi kay duna na siya’y binuhatan kaniadto. Sa laktod, kinahanglan mosalig ka’g balik niya kun mag-uli mo. Apan ayaw’g kumpyansa, duna siya’y katakos  nga mopasakit kanimo.

Pero dili maayo kun makigbalik ka aron lang mapamatud-an nga ikaw ang gipili sa kataposan. Dili ni nimo angay ikapasigarbo. Wala ka nidaog.

Ang tinuod, nibalik ka sa sugod, kay imong gidawat og  balik ang tawo nga nangilad nimo. Iya ra giduwa-duwaan imong pagbati. Nakigkita sa iyang ex samtang kamo pa, nisugot magbuwag mo kay nasakpan nimo, apan karon mobalik kanimo. Unsa may nahitabo nila sa iyang ex?

Nibalik ba siya kanimo tungod lang kay nagbuwag sila? Buot pasabot dili ka niya lingi-on kun sila pa. Sa laktod, gihimo lang ka nga spare tire. Gamiton ra niya kun kinahanglanon. Wala siya’y gugma kanimo, kay kun duna pa, dili siya makaako budhian ka. —Tito Miguel

Magpatambag ka? Ipada kang Tito Miguel: 0991-318-9366