Supak ang pamilya sa uyab

Dear Tito Miguel,

Ako diay si Giana, usa ka tomboy taga Mabolo, Cebu City. Duha na ka tuig ang relasyon namo sa akong girlfriend. Okay ra gyud ang dagan sa among relasyon. Na-feel gyud nako ang gugma sa akong uyab dinhi kanako. Apan usa ra gyud ang problema  namo sukad pa sauna. Wala gihapon ko madawat sa ginikanan sa akong girlfriend. Dili ko nila madawat tungod sa akong pagkatawo, kay dili daw nako mahatagan og anak ang akong girlfriend.  Unsay matambag nimo nako? Ako nalang kaha buhian ang among relasyon ? O kever nalang sa komento sa iyang ginikanan? — Giana

Giana,

Natural ra’g masabtan ang pagsupak sa iyang mga ginikanan. Gikan sila sa henerasyon nga bawal ang inyong relasyon. Nahigot sab sila sa pagtuo nga angay maminyo ug manganak ang babaye.

Ayaw pugsa nga usbon nila ilang baruganan. Ikaw ra’y maugtas, kun imo silang kumbinsihon, samot dili mo magkasinabot. Kay ang pagtuo, labi na sa relihiyon ug gugma, wala sa rason, naa sa emosyon ug pagdawat niini sa imong kaugalingon. Ang imong karelasyon kay ang anak, dili ang ginikanan. Pasagdi, bahala’g supak sila basta nagkasinabot mong duha. Dili na mistil pa ipaglaban ninyo inyong relasyon kanila, padayon lang gihapon. Aron dili ka maapektohan, ayaw ibutang inyong kaugalingon sa sitwasyon nga ilang tulisokon. Ayaw mo pakita nila nga nagkuyog. Pasagdi imong uyab mo-amuma sa iyang pagka-anak. Wala ka’y labot, anak na siya daan nila sa wala pa mo nagkauyab. Hatagi’g panahon sa iyang pamilya, higala ug kanimo. Dili kinahanglan magsige’g sikit, basta wala mo’y gibuhat nga dautan samtang layo mo sa usa’g usa.

Pero ikaw ayaw pakita nila, tabla ra’g nihatag ka nila’g higayon nga supakon inyong relasyon. Ihilom inyong relasyon, labi na sa social media. Dili kinahanglang ibandera, labi na ang inyo nga duna pa’y pipila dili makadawat, apil ang pamilya niya. Ang importante malipayon mong duha sulod sa inyong relasyon. Karon kun siya na mismo magduha-duha, diha na ka mohukom kun angay pa ba mo magpadayon. Samtang kamo pa, tagamtama, sa dili pa mausab iyang hunahuna. — Tito Miguel

Magpatambag ka? Ipada kang Tito Miguel: 0991-318-9366