Karong Gabii

CEBU, Philippines — Koronasyon sa Mr. Friendship International Philippines 2024

Mahibaw-an  na karong gabii kun kinsa  ang makaangkon sa titulo nga Mr. Friendship International Philippines 2024.

Pagahimoon ang koronasyon sa WaterWorld Cebu kun diin 24 ka official candidates ang magtigi sa korona.

Atol sa presscon sa niaging adlaw,  gipasigarbo sa mga nagdumala sa maong indigay nga dili basta-basta ang ilang candidates nga nagikan sa nagkalain-laing dapit sa nasud.

Ang  candidates kay nagtangag og mga maayong kalidad ilabi na sa kaambong, pagka-utokan ug pagka-boutan.

Duna pud sila'y  nagkadaiyang adbokasiya nga nakapalig-on og samot sa ilang pagkatawo.

Una na nga gibutyag sa  national directors sa maong indigay  nga sila si Andy Cayna, RL De Leon Lacanienta, James Tiu, ug ang kaabag nila dinhi sa Sugbo nga si Jed Rimmele  nga hugyaw nga presentasyon ang mapaabot  alang sa mga Sugbuanon   sa nahisgotan nga indigay.

Napili nila ang Sugbo isip venue sa maong indigay  karong tuiga sanglit nasayod sila kun unsa ka hugyaw ang kapasidad  niini sa pagdumala og mga dagkong kalihokan.

Kahinumdoman  nga  ang naghupot sa titulo nga Mister Friendship International Philippines sa niaging tuig kay ang representante sa Dakbayan sa Sugbo   nga si Vince Drexsil Tudtud. Ang mahimong mananaog sa maong indigay kay maoy pambato sa Pilipinas alang sa international level niini  nga pagahimoon sa Taiwan karong Disyembre.

Usa sa mga  tingoha sa maong indigay  mao pagpatigbabaw sa panaghigalaay sa tanan ,ingon man usab ang pag-umol og mga programa nga makatabang sa komunidad.