PBA Season 49 mosikad na karong hapon

CEBU, Philippines — Ang ika-49 nga season sa PBA pormal nga buksan uban ang usa ka duwa karong adlawa didto sa Smart Araneta Coliseum. Ang All-Filipino Cup defending champion Meralco Bolts makigharong sa Magnolia Hotshots saa bugtong aksiyon sa Governors' Cup nga gikatakda sa alas 7:30 sa gabii.

Sa dili pa ang nag-inusarang kumbati, ang 48th season Leo Awards mosikad sa selebrasyon sa bag-ong season sa liga sa alas-4 sa hapon diin inanunsiyo ang MVP, Rookie of the Year, Mythical Teams, All-Defensive Team, Most Improved Player, ug ang Samboy Lim Sportsmanship award.

Ang garbo sa Sugbo nga si June Mar Fajardo naglaraw nga inaton ang rekord niyang sagunson nga MVP awards ngadto sa walo, apan ang teammate niyang si CJ Perez sa San Miguel Beermen ug ang big man nga si Christian Standhardinger lagmit nga mobaraw sa iyang tinguha.

Si Standhardinger kanhi sakop sa Barangay Ginebra apan moduwa na sa Terrafirma ning season. Sikit kaayo ang karera pagka-MVP tali nilang Fajardo, Perez, ug Standhardinger.

Nilang tulo, ang 6'10" nga higante gikan sa lungsod sa Pinamungajan maoy nag-una bitbit ang 42.1 statistical points gikan sa iyang average nga 17.8 puntos, 13.4 rebounds, 2.8 assists, ug 1.7 blocks matag duwa.

Si Standhardinger adunay 37.8sps luyo sa iyang average nga 19.2 puntos, 10.2 rebounds, ug 5.0 assists, samtang si Perez ikatulo uban ang 37.4sps kortesiya sa iyang average nga 18.9 puntos, 6.3 rebounds, 3.7 assists, ug 1.9 steals matag duwa.

Sa laing bahin, si Stephen Holt, nga anaa na karon uban sa Barangay Ginebra, hayag na kaayong mosakmit sa pasidungog isip Rookie of the Year.-