Krusyal nga away alang ni Gabunilas karon sa Japan

CEBU, Philippines — Si John Paul "Angas ng Cebu" Gabunilas sa ARQ Stable mopas-an og mabug-at nga misyon sa dihang iyang hagiton si Thai knockout artist Thanongsak Simsri alang sa OPBF light flyweight belt karong adlawa (Dominggo, Agosto 4) didto sa Edion Arena sa Osaka, Japan.

Nasugamak sa duha ka sagunson nga kapidihan, usa kini ka krusyal nga away nga si Gabunilas dili mahimong mapilde.

Gawas sa personal niyang katuyoan, ang 23-anyos nga si Gabunilas mag-atubang sab og malisud nga tahas nga pakgangon ang tulo ka sunod-sunod nga pagkahagba sa mga boksidor sa ARQ didto sa Japan.

Mismo si Gabunilas kabahin niining mapait nga kapakyasan sa dihang gi-TKO siya sa ikalimang hugna ni Kanamu Sakama sa iyang international debut niadtong Disiembre 26 sa miaging tuig didto sa Ariake Arena. Kontrobersiyal hinoon ang maong desisyon nga gihulagway sa kadaghanan nga sayo ra kaayo ang pagka-undang sa reperi.

Human ni Gabunilas, duha pa niya ka stablemates ang naparot sa una nilang away gawas sa nasud.

Si Rodex Piala miyukbo ngadtong Kenji Fujita pinaagi sa unanimous decision sa ilang WBO Asia Pacific featherweight title bout niadtong Hunyo 1 didto sa Korakuen Hall sa Tokyo.

Tulo ka semana ang milabay, si Yerroge “The Scientific” Gura nakatilaw sa una niyang kaparotan pinaagi sa unanimous decision sa mga kamot ni Ayumu Sano sa ilang WBC Youth super flyweight championship match didto sa Shizuoka.

Karon, bukid ang tungason Gabunilas (10-3, 7KOs) sa iyang tinguha nga santaon ang malas sa ARQ didto sa Japan gumikan kay pader man ang banggaon niyang si Simsri, nga mipakatug og 31 sa 34 niini ka mga biktime uban ang usa pa lamang ka pilde.

Lisud man tuod apan si Gabunilas obligado nga modaog gumikan kay ang resulta niining awaya maoy modetermina kon unsay ugma nga nagpaabot kaniya.