Regine, inawit ang Pamilya Sagrado

Mapanakit na rendisyon ang hatid ng Asia’s Songbird na si Regine Velasquez-Alcasid sa Ulit Ulit, ang official theme song ng inaabangang ABS-CBN family drama na Pamilya Sagrado.

Tungkol ang Ulit Ulit sa maling pagtitiwala sa isang minamahal.

Samu’t saring papuri agad ang natanggap ng kanta sa YouTube dahil sa matinding emosyon na hatid nito.

Sabi ng isang YouTube viewer, “Hauntingly Beautiful!!!!! Grabe talaga kumanta si Queen Regine! Damang dama mo! Ang gandaaaa ang galing!! Mapanaket!! Nag iisa ka Songbird!!!”

Pinuri naman ng isang online viewer ang vocal layers na tampok sa awitin. “Grabe yung vocal layers. Ang sarap pakinggan. Hindi lang basta nagkukwento si Regine sa kantang ito, talagang sinigurado niyang maipaparating niya rin yung emosyon na nais iparamdam ng kantang ito.”

Tampok din sa awitin ang back-up vocals ng Kapamilya artists na sina Lyka Estrella at Trisha Denise.

Pangungunahan ni Piolo Pascual kasama sina Kyle Echarri at Grae Fernandez ang Pamilya Sagrado na magsisimula nang ipalabas sa Lunes (Hunyo 17), 8:45 p.m. sa Kapamilya Channel, A2Z, TV5, Kapamilya Online Live, at TFC. Mapapanood din ito 48 oras bago ang TV broadcast sa iWantTFC.