PBBM, pinasalamatan sa Eddie Garcia Law ni Bong!

Kabilang si Sen. Ramon ‘Bong’ Revilla Jr. sa mga natuwa matapos ang pagsasabatas ng Republic Act No. 11996 o ang Eddie Garcia Law na layong protektahan ang kapakanan ng mga manggagawa mula sa industriya ng pelikula at telebisyon kung saan isa siya sa may akda ng naturang batas.

Maraming umaasa na magiging maganda ang epekto nito sa manggagawa ng pelikulang Tagalog na malungkot talaga sa kasalukuyan ang kalagayan. “Sa wakas ay tuluyan nang naging batas itong itinulak nating panukala para sa sa kapakanan ng ating mga kasamahang manggagawa sa industriya ng pelikula at telebisyon. Nagpapasalamat tayo kay President Ferdinand Bongbong Marcos Jr. for enacting this law. Sobra akong nagagalak! We fought long and hard for the passage of this measure. This is a victory for our our workers and the industry,” paliwanag ni Sen. Bong.

“Mula noon ay lagi ko na ngang sinasabi, sa industriyang ito na ako isinilang at dito na ako nagkamuwang. Utang ko po sa industriya, sa mga manggagawa, at sa publiko kung nasaan ako ngayon. This is one way of giving back,” dagdag pa nito.

“Malaking trahedya man ang pagpanaw ng isang Eddie Garcia, maganda naman na nagbunga ito sa higit na proteksyon para sa mga artista at manggagawa ng industriya,” dugtong pa ni Revilla.

Tinitiyak ng Eddie Garcia Law na ang mga manggagawa sa pelikula at telebisyon ay mabibigyan ng proteksyon ng kanilang mga employer sa lugar ng kanilang pinagtatrabahuhan. Nakasaad din dito na dapat ay ipatupad ng employer ang tamang oras ng isang ordinaryong nagtatrabaho at maging ang tamang pasahod at kaukulang benepisyo tulad ng  social security at iba pang benepisyo, basic necessity, health and safety, working conditions and standards, at insurance para sa manggagawa.

“Tito Eddie, this is for you and our friends and family in the industry. Maraming-maraming salamat for inspiring us to fight for this,” pagwawakas pa ni Revilla.