Siddhartha The Musical ipasundayag sa South Africa

CEBU, Philippines — Human sa malampuson nga mga pasundayag sa Siddhartha the Musical sa 15 ka mga nasud sa milabay'ng 17 ka tuig, ang usa sa mga longest running musical sa Pilipinas ipasundayag na sa The Mandela sa Joburg Theater sa Johannesburg, South Africa karong May 11 ug 12, 2024.

Nagpanikad na ang Siddhartha Theater Ensemble nga maoy mohatag og kinabuhi sa istorya ni Prince Siddhartha.

Ang mga bitoon  sa maong musical sila si Benjie Layos, Van Duke Gacayan, Barret Oliver Richards, Francis Eric Isidro, Pia Christine Rafols, Ivy Melody Gallur, Ana Preciosa Bacalso, Fritz lan Palomares, Joer Ivan Gallur, Manchie Maloloy-on, Dexter Dico, Steven Peralta, Denmark Brinces, Andrew Ortiz, Niño Fritz Sianson, Cecille Chloe Capatoy, Charlene Caberte, Joana Marie Modesto ug Giselle Abalos.

 Gibase kini sa libro nga "The Biography of the Sakyamuni Buddha" ni Venerable Master Hsing Yun kinsa maoy founder sa Fo Guang Shan.

Gani, siya usab ang founder sa Chu Un Temple diha  sa V.  Rama St., Cebu City.

Ang maong dula sa entablado kay nagtuyok sa istorya ni Prince Siddhartha nga natawo  2,600 ka tuig na ang nilabay didto sa karaang siyudad sa India nga gitawag og 'Kapilavastu'  Gisalikway sa batan-ong prinsipe ang iyang harianong kahimtang ug maluho nga kinabuhi aron mangitag kalamdagan o gitawag nga "enlightenment".

Ang duha ka oras nga pasundayag kay maghatag og kahayag ,  kaalam ug tukmang desisyon sa kinabuhi.

Ang Siddhartha The Musical kay unang gipasundayag niadtong 2007 ug  wala damha sa producers nga molungtad kini og dugay ug mapakita sa nagkadaiyang parte sa kalibutan kun diin ipasundayag gyud kini sa prime venues sa lokal ug international theatrical stages.

Bitbit ang istorya ni Buddha, layo na gyud og naabtan ang maong musical gumikan kay miabot na kini sa Taiwan, Manila, China, Hong Kong, Singapore, Japan, Macau, Malaysia, Indonesia, USA, Australia, New Zealand, Argentina, Brazil, ug Paraguay.

Pagkahuman sa mga pasundayag sa South Africa, ang Siddhartha The Musical gikatakdang mopasundayag pag-usab sa Great Enlightenment Hall sa Buddha Museum sa Kaohsiung, Taiwan karong Mayo 18 ug 19, 2024.

Ang Siddhartha the Musical na-imprenta na kini sa kasaysayan isip usa sa  mga labing dugay na nga musical play sa Pilipinas. Ang kakugi sa kapin sa 500 ka mga cast nga nahimong bahin sa produksiyon nakatampo sa pagkatukod sa Guang Ming College-Cebu, nga usa ka gihandum nga tunghaan nga tumong alang sa mga kabatan-onan nga Pilipino nga buot nga magtuon og performing arts.

Ang maong musical kay nagikan liriko sa Cebuano songwriter, record producer, musical director, ug stage director nga si Jude Gitamondoc. Gani, ang iyang mugna gidungagan ug gipalambo pa kini nila ni Jason Abella, Bob Aves, ug Grace Nono.

Si Junrey Alayacyac, kinsa usa ka cast sulod sa usa ka dekada, maoy direktor sa duha ka oras nga bersyon sa musical.