Ngil-ad og batasan

Dear Tito Miguel,

Maayong adlaw , ako diay si Jake  , taga Mandaue City . Akong uyab nga si Loraine kay maldita nga wala sa lugar. Bisan unsaon nako og correct sa ngil-ad niya nga batasan , ipalapos ra gyud niya sa iyang dunggan. As in maldita gyud siya, dili pa gyud kahibalo mangayo og sorry bisan klaro na nga sala gyud niya. Iyang rason nga dili siya mangayo og sorry kay mao na gyud daw na ang iyang batasan. Ako na ang naulaw sa iyang batasan. Example sa iyang pagkangil-ad, awayon o singkahan  dayon  niya ang tawo nga dili dayon makasabot sa iyang isulti. Kun duna ko'y malimtan nga mga butang sa among lakaw ,  non stop yawyaw dayon, bisan gamay ra kaayo ang problema. Patabang ko Tito Miguel please , salamat kaayo. — Jake

Jake,

Lisod usbon ang natural. Wala siya’y nakitang sayop o ngil-ad sa iyang batasan, ngano man tuod iya man usbon. Gani, siya na mismo namulong nga dili siya mangayo’g pasaylo bahala’g sayop o nakapasakit siya sa uban, ka’y mao gyud na iyang batasan. Buot pasabot ang mga tawo sa iyang palibot maoy mosabot kaniya . Kinahanglan dawaton siya kun unsa siya. Kun dili mo kaagwanta, biya kaniya. Take it or leave it, kun sa inenglis pa. Buot pasabot wala siya nahangol ni bisan kinsa, apil na ka. Dili siya mag-usab para sa ubang tawo. Wala siya’y respeto, labi na kanimo. Dili lang siya maldita, arogante pa gyud. Dili magpaubos, dili moangkon sa sayop. Insakto pirmi.

Unya makaagwanta ka sa iyang batasan? Ang imong gugma molabaw ba’g makadawat kanunay sa unsa ug kinsa siya? Kun dili, biya na samtang sayo pa. Kun apason ka, ingna mobalik lang ka kun mag-usab siya. Apan lagmit mag-usab ra na kadiyot, mobalik ra gihapon ang natural.

Lisod supakon ang imong kaugalingon ug pagkatawo mismo. Mora ra gud na’g bayot nga imong diktaran nga magpakalaki. Posible itago kadiyot apan dili mausab. Ang natural mogawas gihapon. Busa kun imo dawato’g balik, sa iyang kaugalingon siya usab mobalik. Kun dili ka makaako’g biya, kinahanglan lig-on ka, ka’y iyang batasan mora’g anay nga sige’g kitkit sa imong balay.  —Tito Miguel

Magpatambag ka? Ipada kang Tito Miguel: 0991-318-9366