Suns mipiog sa Nuggets sa OT

CEBU, Philippines — Ang Phoenix Suns nakarekober human mapapas ang 22 puntos nga labaw sa ikatulong kuwarter aron paludhon ang defending champion Denver Nuggets, 117-107, sud sa overtime sa makutas ug kulbahinam nilang sangka sa NBA kagahapon didto sa Ball Arena sa Denver, Colorado.

Si Kevin Durant mipabuhagay og 35 puntos samtang si Grayson Allen miposa og walo ka tres sa iyang 28 puntos aron pangulohan ang Suns, nga mibugha sa Nuggets bisan og mipasud lamang og lima sa 24 nila ka itsa sa katapusang kuwarter

Nabalik ra hinoon ang kainit sa Suns sa dugang singko minutos sa aksiyon diin ilang gilabhan ang Nuggets, 15-5.

Si Jamal Murray mitali og 28 puntos samtang si Nikola Jokic mikolekta og 25 puntos, 16 ka rebounds, ug lima ka assists sa pilderong Nuggets.

`Sa laing duwa, si Luka Doncic mirehistro og triple-double uban ang 37 puntos, 10 ka rebounds ug 11 ka assists apan dili kini igo gumikan kay ang Dallas Mavericks nahagba ngadto sa 137-120 nga kaparotan sa mga kamot sa Indiana Pacers.

Mangtas kaayo ang opensa sa Pacers diin siyam sa ilang players ang mirehistro og double figures.

Didto sa New York, ang Philadelphia 76ers nahisukamod sa 112-107 nga kapildihan ngadto sa Brooklyn Nets.

Sa Toronto, ang New Orleans Pelicans milampornas sa Raptors, 139-98.

Si Trey Murphy mitali og 34 puntos alang sa Pelicans, nga nagpabiling ikalima sa Western Conference bitbit ang 37-25 rekord. (BANAT NEWS)