Mga Sugbuanong karateka misidlak sa nasudnong bantawan

CEBU, Philippines — Walo ka mga Sugbuanong karateka ubos sa Association for the Upliftment of Karatedo (AUK)-Cebu Headquarters ang misidlak sa 5th Karate Pilipinas National Championships  nga gipahigayon niadtong Marso 1-3 didto sa Tagaytay Combat Sports Center sa Tagaytay City.

Ubos sa paggiya ni AUK founder Rhodee Antoinette Saavedra, kanhi karate world champion nga maoy ilang coach ug trainer,ang mga pambato sa Sugbo mihakot og unom ka gold medals uban ang duha ka silver ug upat ka bronze sa tulo nag adlaw nga torneyo nga gipasiugdahan sa Karate Pilipinas Sports Federation Inc.

Si Alexis Nicole Villacarlos, nga estudyante sa Cebu Eastern College (CEC), milabni og duha ka bulawang medalya sa 14-15 years old cadet female open kata ug -61kg category.

Tungod niini, si Villacarlos naka-angkon og luna sa tulo ka mga internasyonal nga kompetisyon sugod sa Southeast Asian Karate Championships karong Abril 24-26 didto sa Bangkok, Thailand, ug dayon sa Cadets, Juniors and Under 21 Asian Karate Championships karong Agosto didto sa kaulohan.

Dugang niini, si Villacarlos morepresenta sab sa Pilipinas sa World Karate 1-Youth League karong Mayo 16-19 didto sa Coru a, Spain kauban ang duha ka national athletes nga sila si Giovanni Ephraim Apuya ug Rus Josua Macaya.

Si Macaya mipugnit og gold sa -55kg Under 21 male kumite ug silver sa -55kg senior male kumite, samtang si Apuya nakalabni og gold sa U21 make kata ug bronze sa senior male kata.

Si Roshenne Maira Silva nakamina og gold sa -61kgs U21 female kumite ug bronze sa -61kgs senior female kumite, samtang ang  Jeremy Laurence Nopre ang mitunol sa laing gold sa senior male kata.

Si Felix Calipusan Jr. mitampo og silver sa senior male kata, samtang ang ubang mga bronze medalists mao sila si Rik Simon Macaya sae -68kg junior male kumite ug Allison Kyle Quiroga sa senior female kata. (BANAT NEWS)