Uyab nga damak

Dear Tito Miguel ,

Ako diay si  Amer, taga Brgy. Tisa ,Cebu City. Naproblema ko ron sa akong uyab nga si  Charice kay bisan unsaon nako og tambag, damak gyud kaayo. One year kapin nami nga nag-ipon , apan dili gihapon siya kahibalo maghinlo sa iyang mga butang. Pataka lang og butang sa iyang bulingon. Unsaon nalang ni nako siya? Ako nalang siya nga buwagan? —Amer

* * *

Amer,

Dunay pipila ka makatarunganong rason aron putlon ang relasyon. Nihupas ang gugma, dunay lain, dili na malipayon ang usa o kamong duha, dili na magkasinabot, gubot pa sa lukot.

Kun nihupas imong gugma tungod sa iyang kadamak, biya na. Apan kun gihigugma pa nimo siya, iyang pagkahugawan dili pa bug-at nga rason aron imo siyang biyaan. Dagko na mo nagkita, buot pasabot sa lain-lain nga pamilya ug palibot namugna inyong tagsa tagsa ka batasan. Lagmit para niya limpyo ug organisado siya, pero para nimo,  siya hugawan ug katag. Pero dili niya puwede ipangatarungan ang iyang nadak-an o naandan. Angay siya makaamgo nga dunay sayop sa iyang batasan. Kun kapila na nimo siya gibadlong apan dili gihapon magtarong, buot pasabot wala siya’y nakitang problema sa iyang batasan. Busa wala siya’y angay usbon, lagmit gani ikaw pa iyang basolon. Busa ayaw na’g pugsa, ikaw ang alkanse.

Kun dili na ka kaagwanta apan gihigugma gihapon nimo siya, ayaw na mo’g ipon. Lain-lain man mo’g barometro sa kalimpyo, mas maayo magbuwag mo’g balay aron ikaw ang masunod sa imong gusto ug siya makapabuhagay. Lagmit mangamuyo’g mopasalig mag-usab, hatagi’g higayon, apan ini’g balik sa naandan, balhi’g balay.

Bisitaha lang siya. Pero’g di ka mahimutang sa kahugaw, siya ang paadtoa sa imo, aron makita niya unsay diperensiya sa limpyo’g hapsay ngadto sa hugaw’g gubot. Pero sa usa ka kundisyon, sundon niya imong patakaran sa kalimpyo. Kay kun iyang dalhon ang iyang batasan sa imong lugar, tabla ra nga nag-ipon gihapon mo.  Tito Miguel

Magpatambag ka? Ipada kang Tito Miguel: 0991-318-9366