Paghangop sa edad

CEBU, Philippines — Gihangop ni Ashley Ortega  ang pagtungtong niya og 25 anyos inubanan sa tam-is nga pahiyom.

Bag-ohay lang gisaulog sa aktres ang iyang birthday ug gipakita niya ang video samtang nag-enjoy siya og rampa sa baybayon.

"Living life at 25! Thank you for all the lovely birthday greetings and wishes!" ,matud pa ni Ashley.

Manalipod kang Jennica

Gipasalig ni Christian Bables ngadto sa aktres nga si Jennica Garcia nga iya kining protektahan .

Mao kini ang birthday message ni Christian ngadto kang Jennica .

"Happy birthday, mahal ko! Mamahalin at poprotektahan kita hanggang humihinga ako tol," matud pa ni Christian.

Kahinumdoman nga nagkasoud og maayo ang duha human sila nagkauban kaniadto sa Kapamilya series nga Dirty Linen.

MUP-CEBU Kris Tifanny napili nga  Darling of the Press

Ang representante sa Cebu City North nga si Kris Tiffany Janson maoy nakalangkat sa pasidungog nga “Darling of the Press” atol sa  sashing ug press presentation  sa Miss Universe Philippines Cebu  nga gipahigayon didto sa Cube Wing Atrium sa SM Seaside City sa niaging adlaw.

Ang representante sa Carcar City nga si  Mipsen Cavales maoy nakaangkon sa ikaduhang puwesto alang sa maong klase nga pasidungog,samtang ang ikatulong puwesto kay nakuha sa  pambato sa Bantayan Island nga si Juvel Ducay.  Ang grand coronation night kay mahitabo karong  Pebrero  3, 2024.

Gipaabot nga magmaya og taman ang mahimong rayna  sa umaabot nga Miss Universe Philippines -Cebu 2024  gumikan kay moabot og P2 million nga total sa premyo nga gilangkoban sa cash , gift certificates ug uban  pa ang nagpaabot niini. Gianunsyo usab dili pa lang dugay nga duna pu'y "house and lot" nga pa-premyo.

Ang MUP-Cebu maoy dugang  prestihiyosong indigay  nga  nisulbong alang sa mga Sugbuanon  nga nailhan isip   mga banggiitan sa natad sa indigay. Ang maong indigay kay gihuptan  sa mga tang-an sa maong industriya nga sila si  Danny Booc, Irma Payod-Bitzer, ug Jocelyn Tagulao.

Patay nga lawas ni Lee Sun Gyun nakaplagan

Nakaplagan  nga wala na'y kinabuhi ang  South Korean actor nga si Lee Sun Gyun sulod sa iyang sakyanan kagahapon.

Ang iyang sakyanan kay nahimutang sa  Waryong Park sa Seoul.

Nitumaw ang mga pagduda nga posibleng nagkutlo sa iyang kinabuhi ang aktor. Padayon ang imbestigasyon sa kapolisan kalabot sa kamatayon ni Lee.

Kahinumdoman nga niadtong  Oktubre 2023 , nalambigit ang aktor sa pagamit og ginadiling drugas. Nailhan usab si  Lee sa kadaghanan gumikan sa  iyang pagkalakip  sa Oscar-winning film nga "Parasite". 

Makita sa Netflix

Makita na sa Netflix ang Star Cinema movie nga  "A Very Good Girl" nga gibidahan nila ni Kathryn Bernardo ug Dolly de Leon.Ang maong pelikula kay ubos sa direksyon ni Petersen Vargas.  Nalakip usab niini sila si Jake Ejercito, Angel Aquino, Chie Filomeno, Donna Cariaga, Gillian Vicencio, Ana Abad Santos, Kaori Oinuma, Althea Ruedas, Nathania Guerrero, ug Nour Hooshmand.

Diskriminasyon

Aduna higayon nga ni-walk out si  Diana Zubiri sa usa ka  branch sa luxury brand didto sa Australia gumikan sa  staff nga wala kaayo motagad kaniya gumikan sa iyang gisuot. Suma pa ni Diana nga tataw nga usa kini ka diskriminasyon ug wala gyud siya nahimout sa maong staff.

Trabaho lang sa showbiz

Dili intresado sila si Ysabel Ortega ug Miguel Tanfelix nga mag-partner sa negosyo . Mas uyon sila sa maong  senaryo aron wala sila'y daghang huna-hunaon.Kontento na sila nga mag-uban sa showbiz projects.

GomBurZa nauyonan sa mga Sugbuanon

Nakadawat og mga positibong feedback ang usa sa mga entry sa Metro Manila Film Festival nga "GOMBURZA"  ug gikatahong nataypan usab kini sa mga  Sugboanon.

Gani dunay uban niini kay nipasiugda gyud og mga special screening sa pipila ka mga sinehan dinhi sa Sugbo aron mas mapasiatab pa og taman ang bug-at nga mensahe sa pelikula.

Usa sa mga nangumpanya og maayo sa GomBurZa mao ang magtutudlo nga si Emmanuel  Nadela kinsa nitataw nga kinahanglan gyud nga mahibaw-an sa kadaghanan ang mga nahitabo kaniadto ilabi na sa mga inbidwal nga nanalipod sa mga Pinoy. Ang pelikulang GomBurZa kay nagtuki  sa kaagi sa mga martyr nga pari nga sila si  Padre Mariano Gomes, Padre Jose Burgos, ug Padre Jacinto Zamora.

Gibitoonan kini nila ni  Dante Rivero, Cedrick Juan, ug Enchong Dee. Aduna pu'y espesyal nga partisipasyon niini ang aktor nga si Piolo Pascual. Si Pepe Diokno ang direktor sa maong pelikula.