Matinabangon nga beauty queen

CEBU, Philippines —  Gipaneguro  sa bag-ohay lang napili nga  Mrs. Continental International 2023 nga si Loue Manuel-Bozhilov nga hatagan gyud niya og pagtagad ang  pagtabang sa mga nanginahanglan ilabi na mga kabos nga  kabataan nga nagtingoha nga mo-eskwela.

Suma pa Loue nga pinaagi sa maong programa , mas mahatagan og lapad nga kahayag nga matuman ang  gipangandoy  sa kabataan ilabi na sa target nila nga trabaho.

" Through this mission, I aspire to provide underprivileged children access to education,” niya pa.

Ang  46 anyos nga  beauty queen maoy  nangulo sa programang  Eskwela: Shaping Futures through Education" ug duna na’y pipila ka mga  bata ang kasamtangang gisuportahan niini .

 “Kahibalo ta kun unsa ka importante ang edukasyon.  Ganahan gyud ta nga daghan ang makahuman sa pag-eskwela ilabi na kadtong wala’y ikagasto ,” matud pa ni Loue atol sa presscon nga gipasiugdahan sa RapidMind Public Relations by Ryan Mark.

Tingoha gyud niya nga makaumol og mga butang nga dunay positibong impact ngadto sa katawhan.

Nasayran nga naglawig ang pangalan ni  Loue human sa iyang paglangkat sa titulong Mrs. Continental International 2023 kun diin ang koronasyon niini nga gipahigayon didto sa Mumbai, India sa niaging buwan.

Aminado siya nga dili lalim ang pagsalmot og usa ka indigay gumikan kay kinahanglan gyud ang saktong pagbalanse sa oras ilabi na nga usa siya ka  inahan  .

Busy usab siya sa iyang negosyo  nga real estate , apan gipaneguro niya nga dili maapektohan ang uban pa niya nga mga  obligasyon sa kinabuhi.

Natawo si Loue sa Maripipi Island, Leyte ,  apan nibalhin na siya og puyo dinhi sa Sugbo sa dihang nitungtong na siya og 12 anyos.

Ben&Ben ug Belle nag-uban sa  “Autumn”

Nag-uban ang banda nga  Ben&Ben ug ang  new gen phenomenal actress nga si Belle Mariano alang sa  duet version sa awit nga  “Autumn” nga nalakip sa  official soundtrack sa “Can’t Buy Me Love.”

Gihulagway sa  “Autumn” ang pagsulay nga nahiagoam sa mga nagkahigugmaay  nga duna gyu’y nagpahipi nga distansya.

 Gisulat kini sa mga miyembro sa Ben&Ben nga sila si   Paolo Benjamin ug  Miguel Benjamin .  Ang maong banda gihapon ang nag-produce niini inibuban nila ni   ABS-CBN Music creative director Jonathan Manalo ug Jean Paul Verona. Unang gi-release sa  banda ang orihinal nga bersyon niini niadtong  Nobyembre.

Dili pa lang dugay, gilusad ni  Belle ang album nga “Somber”  nga dunay  original tracks nga “Bugambilya”  ug  “Somber and Solemn”.

Niarangkada dayon kini sa  unang pwesto sa  iTunes Philippines albums chart ,samtang ang unom ka mga kanta niini kay nakasulod sa  top 30 ng singles chart.  Gawas  sa musika, nailhan usab si  Belle isip banggiitan nga  aktres nga nahimong bida sa  “He’s Into Her” ug  romcom films nga “Love Is Color Blind” ug  “An Inconvenient Love.” Kasamtangan siya nga makita isip  Caroline sa hit primetime series nga “Can’t Buy Me Love” kauban  ang iyang  on-screen partner nga si Donny Pangilinan.

Ang Ben&Ben kay usa ka award-winning  nga folk-pop band. Bag-ohay lang, naangkon sa Ben&Ben ang duha ka bilyon nga  streams sa Spotify, ug sila ang nakahupot sa  rekord nga labing daghan nga  # 1 sa platform ug most streamed OPM artist sa kasamtangang panahon.

Madungog ang version sa  Ben&Ben ug Belle sa  “Autumn” sa nagkalain-laing  streaming platforms.