Gibuwagan tungod sa kamaldita
Dear Tito Miguel,
Ako diay si Charice , taga Mabolo ,Cebu City . Gibuwagan ko sa akong kapuyo nga si Janjan tungod sa akong batasan nga puwerting malditaha. Sakit kaayo nga gibiyaan ko niya deretso .Nangayo nako og sorry ug nisaad nga mag-usab nako sa akong batasan . Apan wala niya dawata akong sorry ug final na daw iyang desisyon nga buwagan ko . Unsa akong buhaton Tito Miguel aron magbalik mi? — Charice
* * *
Charice,
Wala na kay laing buhaton pa aron magbalik mong duha. Nangayo na ka’g pasaylo ug nipasalig mag-usab apan wala siya matandog. Sakit, apan himoa kini nga barometro kun gihigugma pa ba ka niya.
Kay kun duna pa siya’y gibati para kanimo, dili siya makaagwanta nga wala ka, mobalik gyud na maski maldita ka. Labi na’g ang kalagot nihupas na, ang gugma ug kamingaw mopatigbabaw na. Tinuod, napuno na siya sa imong kamaldita, apan lagmit duna pa’y lawom nga rason nganong nipalayo siya.
Posible nihupas na ang iyang gugma, ang kainit kaniadto nibugnaw na. Nawad-an na siya’g gana. O dili ba kaha nakakita siya’g lain, gigamit lang niya nga rason imong kamaldita, aron ikaw ang basolon, dili siya. Pero maski asa aning duha ka rason ug uban pa nga siya ra’y nakahibawo, usa ra’y buot pasabot, wala na siya’y gugma kanimo. Natural ra imong gibati nga gustong makig-uli, labi na’g kalit lang siya nibiya.
Maglisod ka kay kalit nausab imong naandan, ug nagpabilin gihapon ang imong gugma kaniya. Agwantaha lang, tagamtama ang kasakit ug kamingaw hangtod kini mahanaw. Ayaw pugsa nga maulian dayon ka, kay ang emosyon dili kini bombilya nga mahimo pagngon o pasigahon maski unsa orasa.
Apan siya kanimo nag- brownout, gipaputol na niya ang linya.Dili na masumpayan pa, gawas kun duna’y moabot nga lain para ibalik ang kahayag sa imong kinabuhi. Kana ang paabota, apan timan-i, ayaw na pasobrahi’g minaldita. Sa primero cute pa na, madugay mahimo na ka ilabay. Tito Miguel
Magpatambag ka? Ipada kang Tito Miguel: 0991-318-9366
- Latest
