Ex-BF wala kabayad sa utang
Dear Tito Miguel,
Ako diay si Maricar ,taga Labangon ,Cebu City. Nagoul ko kay ang akong ex-boyfriend ba kay wala pa gyud kabayad sa iyang utang nako nga P30,000 . Uyab pa mi sa dihang nautang to niya kay nipalit siya og cellphone. Hangtud naabtan na lang nga nagbuwag mi, wala gyud siya kabayad. Unsa akong buhaton Tito Miguel? Wala man gud mi kasulatan sa utang kay uyab baya mi niadtong higayona . Unsaon nako pagukod? Paugat kaayo siya. — Maricar
* * *
Maricar,
Kun wala moy kasulatan, lisod na gukdon sa legal nga pamaagi. Wala man kay ebidensiya batok niya. Pero suwayig chat kay basin motubag. Kay kun mosaad mobayad, tabla ra nga iyang giangkon iyang obligasyon kanimo. Pero siguroha nga iyaha na nga social media account o dili ba kaha dunay ebidensiya nga siya na.
Sayon ra man gud paglimod nga dili to siya ang nitubag kanimo o peke to nga account. Konsulta'g abogado aron sigurado. Pero lagmit tambagan ra sad ka nga lisod na gukdon, kalimti na lang.
Pero dili ang leksiyon. Kun dili pa gani kasado, ayaw sagoli'g kuwarta Inyong relasyon. Tinuod samtang kamo pa ihatag nimo ang tanan kay lagi dili ka makaako nga siya pasagdan. Gihigugma gud sa dihang higayona . Ini'g usab sa inyong sitwasyon ug gibati, diha na magyagaw kay gawas nga namuhonan ka'g oras, pag-amuma ug paghigugma, gisagolan pa gyud nimo'g kuwarta.
Dili maayo kay dili pa mo sigurado kun magdayon mo. Gani, ang nagdayon magbuwag gihapon. Diha ra ka motunol sa kuwarta kun iya nang kaluwasan ug kinabuhi ang nakataya, nasakit ba ron o nahospital. Pero cellphone? Ayaw'g pataka'g tunol kay para ra na sa porma. Dapat naalarma na ka nga iyang gipugos paliton apan dili diay niya kaya ang presyo. Puwede ra unta kun imong giregalo, apan gipautang? Angay unta mauwaw siya nga inutang sa iyang uyab ang iyang gadget. Kun dili kaya, ayaw pugsa.Gani, mas maayo tunga mo sa tanang gastohanan aron inig buwag wala'y mamoyboy sa kuwarta. Busa kalimti na lang, hunahunaa na lang imo siyang gilimosan.
Magpatambag ka? Ipada kang Tito Miguel: 0991-318-9366
- Latest
