Hugyaw nga Hiyas Ng Pilipinas 2023

CEBU, Philippines — Nagmalampuson ang grand coronation sa Hiyas Ng Pilipinas 2023 niadtong Sabado sa gabii nga gipahigayon sa Waterfront Cebu City Hotel and Casino.

Ang nagdumala  sa maong indigay nga si Michael Cris "Mike" Traya Sordilla  kay nagpasalamat sa tanang nisuporta sa iyang kawsa alang sa  pag-umol og proyekto nga dunay koneksyon sa pagpangalagad sa komunidad.

Nasayran nga usa sa mga misyon  sa maong indigay  mao ang  pagtabang sa mga kabos nga  makaangkon og igong edukasyon.

Ang Hiyas ng Pilipinas mao ang prestihiyosong indigay sa katahom ug mobida  sa mga katungod  sa kababaenhan ingon man usab sa pag-promote sa turismo sa nasud.

Naputos sa mga pagdayeg ang dagan sa programa ingon man usab ang hugyaw nga stage design niini.

Napili nga Miss Tourism World Philippines 2023 mao ang kandidata nga taga Sarangani Province nga si Fatima Kate Bisan. Samtang nalangkat sa taga Manila nga si  Juvyel Anne Saluta ang titulong Miss Continental World 2023.

Wala usab nagpaulahi ang  representante sa Talisay City,Cebu nga si Jackelaine Adarayan Fleming  kinsa nakakuha sa titulo nga Miss Omninational Philippines 2023.

Ang ubang mananaog kay sila si Tarah Avenir Limjap  sa Koronadal City (1st runner-up) ug Vanessa Baraquio sa  Pangasinan Province  (2nd runner-up).

"With immense gratitude, we mark the triumphant conclusion of Hiyas Ng Pilipinas 2023. Your overwhelming support has been the cornerstone of this unforgettable journey. Thank you from the depths of our hearts," tipik sa post sa social media account sa Hiyas Ng Pilipinas 2023.