Babaye naibog og babaye
Dear Tito Miguel,
Ako diay si Annika ,24 anyos ug taga Tabuelan, Cebu. Ingon sila sexy ug guwapa kuno ko. Pagkahuman nako sa kolehiyo, nabantayan nako nga dili na ka’y ko ma-attract og lalaki. Mas ma-attract ko sa susama nako nga babaye.Hinoun andam nako sa pagdawat nga mahimo kung tomboy. Dili man gud halata Tito Miguel kay sexy baya ko manamit. Daghan kaayo nanguyab nako pero akong gibasted tanan .Maulaw man ko mo-open sa akong pamilya ug barkada uy. Unsaon nako pagsulti nila ang kalabot sa akong sitwasyon? —Annika
* * *
Annika,
Tinuod, lisod ang pagtug-an sa pagkatawo nga gipahipi o gilimod. Apan sa panahon karon, abli na ang hunahuna sa mga tawo, gawas sa mga nagpahigot sa pagtuo nga ang babaye para lamang sa lalaki. Pasagdi sila, wala sila’y labot sa imong kinabuhi. Apan sa pamilya o mga higala, masabtan nga ikaw maguol.
Ipaagi’g binuang, aron ilang reaksyon mahibaw-an nimo daan. Ingna sauna ganahan ko’g lalaki, karon mora’g babaye na man. Tulo ang posible nga reaksyon. Una, moingon wa na ta’y mahimo kun babaye imong gusto, ingna dayon seryoso ka ug mapasalamaton kay kanila wala’y problema.
Ikaduha, mokatawa lang. Dili motuo, sexy ka busa dili mailhan nga babaye na imong gikaibgan. Palabya’g pipila ka adlaw. Inig sunod ninyo kita, seryosoha’g istorya, ingna ang imong gisulti sa niagi tinuod.
Ikatulo, moingon ayaw pag ing ana ka’y dili namo madawat. Ingna dayon magbuot mo kun mao ni akong pagkatawo? Moingon gyud na pagtarong diha. Ingna bitaw imo sa panid-a’g maayo imong kaugalingon. Sunod ninyo kita, ingna sigurado na ka, sa babaye ka maibog. Lagmit sa primero sila mokaging, dili makatuo. Kun dili dayon kadawat, pasagdi lang, ayaw pugsa. Moabot gihapon ang panahon dawaton ka nila. Inay nga mahiubos ka, ipakita nila maayo ka nga tawo, maski babaye na imong gusto. Kun dili gyud ka dawaton, buot pasabot ilang pagpangga kanimo isip anak, igsoon o higala duna’y kondisyon. Apan ayaw sila awaya. Ang importante nakasulti ka, aron mahibaw-an nimo asa taman ilang gugma kanimo. Tito Miguel
Magpatambag ka? Ipada kang Tito Miguel: 0991-318-9366
- Latest
