Cebuana Queen nag-franchise og duha ka prestihiyosong pageants

CEBU, Philippines —  Isip instrumento sa  pagsabwag sa iyang adbokasiya partikular na sa pagtabang sa mga nanginahanglan , wala palabya sa Cebuana queen nga si Mrs. Wilma Laude Zamora ang pagkuha og franchise sa duha ka  titulo  sa mga prestihiyosong indigay.

Laing makasaysayanong  kalihokan ang nahitabo niadtong Martes sa gabii kun diin gihimo ang  official signing ceremony sa  Miss World Philippines Cebu ug Miss Grand Philippines Cebu nga gipahigayon sa  Bai Hotel Cebu.

Ang franchise holder niini nga si Zamora kay nipasigarbo sa laing nakab-ot niya nga kalamposan ilabi na sa natad sa indigay nga dunay maayong tumong.

Nitambong pud sa seremonya ang pipila ka opisyales sa  Miss World Philippines, nga sama nila ni  Aldrich Dabao (General Manager), Krishna Balsarza (Operations Head), ug  Francis Rey Chee (Creative Director).

Nadasig si Zamora sa pag-franchise sa  Miss World Philippines Cebu  ug Miss Grand Philippines Cebu gumikan sa nagpahipi nga bulawanong mensahe sa organisasyon  nga  ,"Beauty with a Purpose" alang sa Miss World  ug  "Stop the Violence and War" alang sa  Miss Grand International.

“This is a dream come true and an answered prayer to be part of Miss World Philippines and Miss Grand Philippines Organizations,” matud pa niya.

Usa si Zamora sa nihatag og importansya sa edukasyon ug usa kini sa mga nag-una niya nga adbokasiya sukad pa kaniadto.

Produkto siya sa  ERDA Foundation Inc.  nga padayon nga nitabang sa mga indibidwal  ug usa pud kini sa nahimong adbokasiya sa  reigning Miss World Philippines 2022 nga si Gwendolyn Furniol.

Aktibo usab si Zamora sa paghatag og suporta sa mga nagtingoha nga mahimong abogado, ug sa mga programa alang sa kababaenhan ug kabataan.

Gusto niya nga maghatag og inspirasyon sa mga  Cebuana alang sa pag-umol og makahuloganon nga impact ngadto sa komunidad.

"I want to support and uplift every Cebuana who carries the torch of change and dedicates herself to Cebu," dugang pa ni  Zamora.

Samtang ang legal adviser ni Zamora nga si  Atty. Christopher Paragamac nibutyag usab nga dunay nakalinya nga mga workshop alang sa mga umaabot nga kandidata sa nahisgotan nga mga indigay.