Pinoy athletes personal nga gipasalamatan ni Pangulong Marcos

CEBU, Philippines — Personal nga gipasalamatan ni Presidente Ferdinand Marcos Jr. ang mga atletang mga Pilipino nga nisalmot sa bag-ohay lang natapos nga 32nd SEA Games sa Phnom Penh, sa Cambodia, diha sa Malacañang.

“We are grateful for President Marcos’ decision to personally award the incentives to Team Philippines, an expression of his admiration to our national athletes and their unwavering passion and dedication for representing the country,” sumala pa ni Philippine Sports Commission chair Richard Bachmann sa gipagawas niyang pamahayag kagahapon.

Si Marcos sab maoy mitunol sa mga cash incentives nga mokabat tanan og P60 milyones para sa mga nakabitbit og medalya gikan sa maong kompetisyon ug P14 milyones pud para sa mga medal winners sa ASEAN Para Games nga gihimo gihapon didto sa maong nasud sa miaging buwan.

Ubos sa balaod, ang SEA Games gold gantihan og P300,000, silver P150,000 ug bronze P60,000 samtang ang para sa  ASEAN Para Games manukad gikan  P150,000, P75,000 ug P30,000.

Samtang ang world champion gymnast nga si Carlos Yulo maoy dako-dako og makobra tungod siya maoy pinakadaghan og nadala nga medalya sa tanang Pilipinong atleta tungod sa duha ka bulawang medalya ug duha ka silver medals sa SEA Games.  Sunod sab si Chesser Darry Bernardo sa national para team human siya nakakuha og unom ka bulawang medalya ubos sa iyang dibisyon para sa mga buta,  samtang ikaduha sab si Cheyzer Mendoza, nga nakabitbit og lima ka bulawang medalya sa women’s section.

“In the past, the PSC conducted two separate awarding for SEAG and APG medalists, but I believe it is more fitting to join the two for the President’s first-ever incentives awarding during his administration,”matud pang Bachmann sa report sa Philstar.com.

Ang Pilipinas mipauli nga nagbitbit og 58 gold, 85 silver ug 117 bronze samtang nabuak sa Para-Olympians ang rekord niini pinaagi sa 34 gold, 33 silver ug 50 bronzes sa ASEAN Para Games.

Ang ilang nadawat nga insentibo, wala pa kini labot sa nahatag sa Philippine Olympic Committee ug sa Manny V. Pangilinan Sports Foundation nga tag P100,000, P50,000 ug P30,000 para sa makadala og bulawan, silver ug bronze nga medalya. —IBM